Շիրակի մարզի կազակների ատաման, գնդապետ Աշոտ Սիմոնյւսնն Aravot.am-ի հետ զրույցում անդրադառնալով շրջանառվող խոսակցություններին, որ Գյումրու քաղաքապետ Վարդան Ղուկասյանը ի պաշտպանություն իրեն կազմակերպված ստորագրահավաքին միանալու խնդրանքով դիմել է տեղի կազակական կազմակերպությանը, վերջիններս Էլ կրավորական կեցվածք են ընդունել, քանի որ կազմակերպության ղեկավարը Սամվել Բալասանյանի խնամին է` ասել է, որ նման բան չի եղել:
«Վարդան Ղուկասյանը նման խնդրանքով չի դիմել: Եթե դիմեր, ինձ պիտի դիմեր, կազմակերպության ղեկավարը ես եմ, բայց չի դիմել»,- ասել է Սիմոնյանը:
«Վերջինիցս հետաքրքրվեցինք՝ եթե Վարդան Ղուկասյանը դիմեր, ի՞նչ դիրքորոշում կորդեգրեր կազմակերպությունը: «Ինքը մեր կազմակերպության համար այնքան է կանգնած եղել և մոտ, որ եթե դիմեր, անպայման… ստորագրահավաքը ո՞րն է, հասարակական կազմակերպություն է, ես մարդկանց իրավունք չունեմ պարտադրելու: Ազատ ընտրություն է. յուրաքանչյուրն իր խելքով կգնար և իր ընտրությունը կկատարեր՝ տեսնելով նրա արած լավությունները»,- ասաց գնդապետ Սիմոնյանը:
Նա նկատեց՝ քանի որ իրենց կազմակերպության գլխադասային կառույցը հանձնարարականներ չի տվել, ինքն իրավունք չունի ինքնազլուխ բաներ անելու»,- ապա «Առավոտ»-ը հավելում է.
«Ինչ մնում է Բալասանյանի հետ խնամիական կապերին, մեր զրուցակիցը հակադարձեց. «Բալասանյան Սամվելը խնամուս խնամու խնամին է: Ես քաղաքում ճանաչված տղա եմ, ես բոլորին ճանաչում եմ, հատկապես նմանօրինակ մարդկանց, ինձ են ճանաչում… Եթե ինձ չեն դիմել, ես էլ կրավորական կեցվածք չեմ ընդունել՝ ո՞նց կարելի է նման բաներ ասել»:
