Հակառակ բազմաթիվ սպորտային կայքերի կանխատեսման, Միրչա Լուչեսկուն Հենրիկ Մխիթարյանին ընդգրկել էր թիմի հիմնական կազմում: Հայաստանի հավաքականի կիսապաշտպանը, որը չափազանց լավ հանդիպում անցկացրեց, Հյուբշմանի հետ տեղ էր զբաղեցրել հենակետային կիսապաշտպանի դիրքում:
Հանդիպումը սկսվեց «Ռոմա»-ի գրոհներով: Մինչև 28-րդ րոպեն կամ մինչև առաջին գոլը խաղադաշտում մեկ թիմ էր երևում` «Ռոման», բայց Պերոտտայի խփած գոլից հետո Լուչեսկուի սաներն ասես կերպարանափոխվեցին և սկսեցին բոլորովին այլ ֆուտբոլ ցուցադրել: Իսկ 29-րդ րոպեին Ժադսոնի խփած պատասխան գոլից հետո խաղի պատկերն ամբողջովին փոխվեց: «Հանքափորներ»-ի անսպասելի խաղից իրենց կորցրած իտալացիները մինչև ընդմիջում ևս երկու գնդակ ընդունեցին իրենց դարպասը: 36-րդ րոպեին Դուգլաս Կոստան անհատական վարպետության շնորհիվ շրջանցեց պաշտպանին և գեղեցիկ հարվածով գնդակն ուղարկեց Դոնիի դարպասը, 5 րոպե անց արդեն կոպիտ սխալ գործեց «Ռոմա»-ի նորվեգացի բազմափորձ պաշտպան Յոն-Արնե Ռիսեն, ինչից անմիջապես օգտվեց ամենահաս Կոստան. վերջինս ճշգրիտ փոխանցումով հարվածային դիրք դուրս բերեց Ադրիանոյին, որը հաշիվը դարձրեց 1:3:
Երկրորդ խաղակեսի սկզբից «գայլեր»-ը սկսեցին ճնշում գործադրել «հանքափորներ»-ի պաշտպանության վրա, ինչը 61-րդ րոպեին տվեց իր արդյունքը. Ժերեմի Մենեզը կենտրոնում ստացավ գնդակը, միայնակ առաջ ընթացավ և մոտ 28 մետրից անհավանական ուժգնությամբ հարվածով գնդակն ուղարկեց Պյատովի դարպասի վերին անկյունը:
Թվում էր` «Ռոմա»-ի ճնշումը կուժեղանա, բայց ընդունած գնդակից հետո Լուչեսկուի սաները հավաքվեցին և արդեն հաջորդ գրոհի ժամանակ Ադրիանոն կարող էր հաշիվը դարձնել 2:4. Հենրիկ Մխիթարյանի թնդանոթային հարվածից հետո բրազիլացին չկարողացավ հասնել Դոնիի հետ մղած գնդակին:
Երկրորդ խաղակեսի միջնամասում Լուչեսկուն հանգստանալու հնարավորություն տվեց Մխիթարյանին և Կոստային` նրանց փոխարեն խաղադաշտ մտցնելով Էդուարդոյին և Վիցենեցին: Ուզում եմ շեշտել, որ հե՛նց հանգստանալու հնարավորություն, քանի որ թե՛ Մխիթարյանը, թե՛ Կոստան հրաշալի հանդիպում անցկացրին: Հանդիպման մնացած հատվածում Ռանիերիի սաները մի քանի խառնաշփոթ գրոհ կազմակերպեցին, բայց այդպես էլ չկարողացան լուրջ վտանգավոր պահ ստեղծել Պյատովի դարպասի մոտ: «Ռոմա»-«Շախտյոր»` 2:3, և Հենրիկ Մխիթարյանի ակումբը զգալիորեն մեծացրեց քառորդ եզրափակիչում հանդես գալու իր հնարավորությունները:
