ՀՀ Մարդու իրավունքների պաշտպանի գրասենյակում հրավիրվել էր քննարկում` «Աջակցություն ՀՀ Մարդու իրավունքների պաշտպանի գրասենյակին` զինված ուժերի առավել արդյունավետ քաղաքացիական վերահսկողություն իրականացնելու գործընթացում» ծրագրի իրականացման մասին թեմայով: Ծրագրի եզրափակիչ հաշվետվությունը ներկայացրին Մարդու իրավունքների պաշտպան Արմեն Հարությունյանը, ԵԱՀԿ ռազմաքաղաքական բաժնի ղեկավար Գժեգորժ Միխալսկին: Նա նշեց, որ հետազոտությունն իրականացրել է «Հանդուրժողականության կենտրոն» հասարակական կազմակերպությունը, եւ դրա նպատակն է եղել տեղեկանալու զինված ուժերում մարդու իրավունքների վիճակի մասին: Գժեգորժ Միխալսկին նշեց, որ ՄԻՊ-ի գրասենյակի աշխատակիցներն այցելել են ինչպես Երեւանում, այնպես էլ Երեւանից դուրս գտնվող զորամասեր: Իսկ ԵԱՀԿ-ն, ըստ Գժեգորժ Միխալսկու, համագործակցում է ՀՀ մարդու իրավունքների պաշտպանի գրասենյակի եւ Պաշտպանության նախարարության հետ: «Մենք միշտ պատրաստ ենք աջակցություն ցուցաբերելու զինված ուժերում հասարակական վերահսկողության աշխատանքներին: Թափանցիկությունը, հասարակական վերահսկողությունը շատ կարեւոր են Հայաստանում, որպեսզի հասարակությունը վստահություն ունենա զինված ուժերի նկատմամբ: Այս հաշվետվության մեջ վեր են հանվում բազմաթիվ գործոններ, որոնք անհրաժեշտ են մարդու իրավունքների պաշտպանության տեսանկյունից»,- ասաց նա: