Հնդկաստանի հարավում այսօր, վաղ առավոտյան, գնացքում բռնկված հրդեհի հետևանքով 25 մարդ է զոհվել: Այս մասին հաղորդում է ITAR-TASS-ը` հղում անելով հնդկական NDTV հեռուստաալիքին: BBC-ի տվյալներով` կա առնվազն 32զոհ:
Հրդեհը բռնկվել է Դելիիից Չենայի ուղևորվող ճեպընթացի վագոններից մեկում: Նախնական տվյալներով` պատճառը հոսանքալարերի կարճ միացումն էր: Գնացքում եղել է 72 ուղևոր: Հրդեհի բռնկման պահին ուղևորների մեծ մասը քնած է եղել:
Երկաթուղային խաչմերուկի հերթապահը մոտեցող գնացքի վագոններից մեկում կրակ է նկատել, ինչից հետո գնացքը կանգնեցվել է հարավային Անդհրա-Պրադեշ նահանգի մոտակա Նելոր քաղաքում:
Տեղի իշխանությունների փոխանցմամբ` ավելի քան 2 տասնյակ ուղևորներ այրվածքներ են ստացել: Բոլոր տուժածներին տեղափոխել են մոտակա հիվանդանոցներ:
