«Ընդդիմադիր դաշտում գործող քաղաքական ուժերի կողմից իշխանափոխության պահանջները նորություն չեն և տարբեր ձևերով են փորձում դա արտահայտել: Սակայն այդ գաղափարի մեջ որևէ ռացիոնալ հատիկ գոյություն չունի: Ի վերջո դա ինքնանպատակ չի, մենք պետություն ենք և ունենք կառավարման տրամաբանություն: 2007 և 2008 թվականների ընտրությունների արդյունքները ամբողջությամբ վկայում են, որ իշխանությունն իր առջև դրված խնդիրները բարեհաջող իրականացնում է և կառավարման գործընթացների մեջ գոյություն չունեն այնպիսի էլեմենտներ, որոնք պատճառ կարող են դառնալ հասարակական դժգոհությունների»,- անդրադառնալով Տիգրան Կարապետյանի սկսած հանրահավաքների շարքին և իշխանափոխության պահանջին «Առաջին լրատվականի» հետ զրույցում կարծիք հայտնեց ԱԺ ՀՀԿ խմբակցության պատգամավոր Արտակ Զաքարյանը:
Զաքարյանի կարծիքով, եգիպտական մոդելը Հայաստանում չի կարող գործել, քանզի մեր հասարակությունը անտարբեր է նման բաների նկատմամբ. «2003թ. երբ եղավ վարդերի, կակաչների հեղափոխություն, ղրղզական մոդել եղավ, մեր ընդդիմությունը փորձում էր դրանք որպես նախադեպ ստեղծել և այդ ալիքի վրա զարգացումներ կանխատեսել նաև Հայաստանի համար, բայց մեր հասարակությունը հետաքրքրություն չցուցաբերեց այդ ամենի համար, որովհետև հասարակությունն ավելի լավ է հասկանում` ինչ է նշանակում պետություն-հասարակություն կապը, քան ընդդիմադիր որոշ գործիչներ»:
