Այսօր Դոնեցկի «Շախտյոր»-ն առաջին անգամ հանդես կգա Չեմպիոնների լիգայի խաղարկության փլեյ օֆֆ փուլում: Հենրիկ Մխիթարյանի թիմի մրցակիցը իտալական «Ռոմա»-ն է: Այս թիմերը միմյանց դեմ խաղացել են երկու անգամ` Չեմպիոնների լիգայի խաղարկության 2006/07 մրցաշրջանի խմբային փուլում: Երկու հանդիպումներն էլ ավարտվել են տանտերերի հաղթանակով: Հռոմում կայացած խաղում գրանցվել է 4:0, իսկ Դոնեցկում` 1:0 հաշիվ:
Թիմերն իրենց առաջնություններում.
«Հանքափորներ»-ն Ուկրաինայի առաջնությունում խնդիրներ չունեն և 19 տուրից հետո վստահորեն գլխավորում են մրցաշարային աղյուսակը` երկրորդ տեղում ընթացող Կիևի «Դինամո»-ին գերազանցելով 12 միավորով: Ինչից կարելի է եզրակացնել, որ Միրչա Լուչեսկուն ամբողջ ուժերը կկենտրոնացնի Չեմպիոնների լիգայի հանդիպումների վրա:
Ի տարբերություն «Շախտյոր»-ի, «Ռոմա»-ի գործերն առաջնությունում այնքան էլ լավ չեն ընթանում, և հնարավոր է, որ թիմը տեղ չզբաղեցնի առաջատար քառյակում և զրկվի Չեմպիոնների լիգայի հաջորդ տարվա խաղարկությանը մասնակցելու իրավունքից: Կլաուդիո Ռանիերիի թիմն այժմ ընթանում է 8-րդ հորիզոնականում և 24 տուրից հետո վաստակել է 39 միավոր:
Մարզիչների խոսքը.
Միրչա Լուչեսկու. ««Ռոմա»-ի մասին շատ դրական բաներ կարող եմ ասել. ուժեղ թիմ է, որ գտնվում է հիանալի մարզավիճակում: Այնտեղ շատ են որակով և փորձառու ֆուտբոլիստները: Նրանք Չեմպիոնների լիգայում հանդես գալու մեծ փորձ ունեն: Մեր առավելությունը մրցակցի նկատմամբ հարձակվողների արագաշարժությունն է: «Շախտյոր»-ի հարձակվողներից յուրաքանչյուրն ի վիճակի է արագության տակ շրջանցել մրցակցի գոնե մեկ պաշտպանի: Կարևորը կարողանանաք խաղի ղեկը մեր ձեռքում պահել, եթե մեզ հաջողվի դա անել, ապա հաղթանակն անխուսափելի կլինի»:
Կլաուդիո Ռանիերի. «Շատ հետաքրքիր հանդիպում է սպասվում. մենք խաղալու ենք հրաշալի թիմի հետ: Ես լավ եմ ճանաչում Լուչեսկուին և անհամբերությամբ եմ սպասում նրա հետ հանդիպմանը: Ես լավատեսորեն եմ տրամադրված: Հաջողության նկատմամբ հավատն ինձ տվել են իմ խաղացողները: Մենք մինչև վերջ կպայքարենք»:
Թիմերի նախնական կազմերն ունեն հետևյալ տեսքը.
«Շախտյոր»` Պյատով, Ռակիցկի, Չիգիրինսկի, Ռաց, Հյուբշման, Ստեպանենկո, Վիլլիան, Ժադսոն, Կոստա, Ադրիանո:
«Ռոմա»` Դոնի, Կասետտի, Մեկսես, Ժուան, Ռիիսե, դե Ռոսսի, Պեռոտտա, Սիմպլիսիո, Մենեզ, Բորիելլո, Վուչինիչ:
Խաղերի ուղիղ հեռարձակումը օնլայն ռեժիմով կարող եք դիտել «Առաջին լրատվականում»: