Հայաստանի պետական մանկավարժական համալսարանի ռեկտոր Ռուբեն Միրզախանյանը համաձայն է ԿԳ նախարար Արմեն Աշոտյանի այն գնահատականի հետ, թե մանկավարժական համալսարան ընդունվում են «ձեռքի հետ»:
Լրագրողների հետ զրույցի ընթացքում Միրզախանյանը նշեց, որ պետք է փոխվի հասարակության մոտեցումը դեպի ուսուցիչը, կարևորվի ուսուցչի դերը մեր կյանքում:
Միրզախանյանը նշեց, որ իրենք քայլեր են ձեռնարկել, որպեսզի երկրի լավագույն մանկավարժական կադրերը դասավանդեն մանկավարժական համալսարանում. «Կարծում եմ` դրան կհետևի նաև շրջանավարտների նոր որակը և նոր արժեքային համակարգը, ինչն, իհարկե, ժամանակ կպահանջի: Ի վերջո, նրանից, թե ովքեր են մանկավարժականի շրջանավարտները, կախված է, թե ինչպիսին կլինի մեր դպրոցը և մեր ապագան»:
Միջին մասնագիտական ուսումնական հաստատությունների պատրաստած մանկավարժական կադրերի խնդրին անդրադառնալով` Միրզախանյանը նշեց, որ նոր պայմանները և որակական աճի խնդիրը ենթադրում են, որ դպրոցի ուսուցիչը պետք է ունենա բարձրագույն կրթություն:
«Բոլոր դեպքերում, ռեֆորմները պետք է կատարվեն քայլ առ քայլ, փակելը, ոչնչացնելը, կրճատելը հարցի լուծում չէ, ճիշտ մոտեցումը զարգացումն է»,- կարծիք հայտնեց Միրզախանյանը:
Հայաստանի պետական մանկավարժական համալսարանի և Ֆինլանդիայի մանկավարժական համալսարանի համագործակցության մասին խոսելով` Միրզախանյանը նշեց, որ հաջորդ ամսին կնքվելու է պայմանագիր, նախատեսվելու է կազմակերպչական և ծրագրային բարեփոխումներ իրականացնել: