Այսօր լրագրողների հետ հանդիպման ժամանակ ՀՀ ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը դժգոհեց, որ ավտոտրանսպորտային միջոցների պարտադիր ապահովագրության դեպքում ճանապարհային ոստիկանների գործը կդժվարանա։ Իսկ պատճառն այն է, որ ճանապարհատրանսպորտային պատահարների բոլոր մասնակիցներն այսուհետև կպահանջեն վարույթ հարուցել։ «Այնինչ ներկայումս պատահարի մասնակից վարորդներն իրավունք ունեն իրար մեջ պայմանավորվելու և իրենք իրենց հարցերը լուծելու», – նշեց նա։ «Աքիլես» վարորդների իրավունքների պաշտպանության կենտրոնի նախագահ Էդուարդ Հովհաննիսյանը, մեզ հետ զրույցում արձագանքելով Նորիկ Սարգսյանին, նշեց, որ եթե վարչական վարույթ է, ապա այս դեպքում տարբերությունը որն է: «Այլ բան է, եթե վարչական վարույթ չկա: Այսինքն` երկու քաղաքացիներն էլ ասում են` «Ես հրաժարվում եմ վարչական վարույթ հարուցելուց»: Այդ հոդվածը ոչ ոք էլ չի վերացրել, նախկինում էլ, հիմա էլ նույն կերպ վարորդները կարող են հրաժարվել վարչական վարույթից: Բնականաբար, հիմա բոլոր գործերը վարչական վարույթ կստանան: Ինչո՞ւ թեկուզ 20 հազար կամ 5 հազար դրամը վարորդները չպետք է վերցնեն ապահովագրականից: Մենք նախկինում էլ էինք ասում, որ այն կազմով եւ այն մեթոդներով, ինչ ճանապարհային ոստիկանությունն է իրականացնում իր փորձաքննությունն ու եզրակացությունները, արդեն շուտվա պատմություն է, քանի որ ամբողջ աշխարհը հիմա այլ եղանակներով է աշխատում»,- արձագանքեց Էդուարդ Հովհաննիսյանը: Հիշեցնենք, որ 2011թ. հունվարից ՀՀ ճանապարհային ոստիկանները կսկսեն տուգանել այն վարորդներին, որոնց ավտոմեքենաները ապահովագրված չեն լինի։ Իսկ տուգանքի չափը կկազմի 50 հազար դրամ։
