Սիրիայում ՄԱԿ-ի դիտորդական առաքելության աշխատակիցների մոտ կեսը, որը լքել է երկիրն այս շաբաթ, կվերադառնա, երբ երկրում իրավիճակը թույլ տա վերսկսել աշխատանքը: Itar-Tass-ի փոխանցմամբ` այս մասին Դամասկոսում մամլո ասուլիսի ժամանակ հայտարարել է ՄԱԿ-ի գլխավոր քարտուղարի` խաղաղարար հարցերով տեղակալ Էրվե Լադսուսը:
«Մենք հայտնվել ենք այնպիսի իրավիճակում, երբ մարդիկ շատ են, աշխատանքը` քիչ: Այդ իսկ պատճառով մենք տուն ենք ուղարկել դիտորդների կեսին: Այն դեպքում, երբ երկրում իրավիճակը փոխվի, ինչին անկեղծորեն հավատում ենք, նրանք բոլորը կվերադառնան իրենց պարտականությունների կատարմանը»,- ասել է նա:
ՄԱԿ-ի Անվտանգության խորհուրդը հուլիսի 21-ին ընդունել էր Սիրիայում դիտորդների առաքելության ժամկետը 30 օրով երկարաձգելու որոշում:
ՄԱԿ-ի գլխավոր քարտուղարի խաղաղարար հարցերով տեղակալը Սիրիայում է երեքշաբթի օրվանից` տեղում գնահատելու տիրող իրավիճակը: Հիմնվելով Լադսուսի հավաքած տեղեկությունների հիման` Պան Գի Մունը կորոշի առաքելության մանդատի ժամկետը երկարաձգելու նպատակահարմարությունը:
