Ամենաընթերցվածները

Իրավաբանական անձ գրանցելու համար կպահանջվի 10 րոպե

Կառավարության վաղվա նիստում կքննարկվի «Իրավաբանական անձանց գրանցման մասին» ամբողջությամբ նոր խմբագրությամբ օրենքի նախագիծը, որն այս դաշտում կատարվող փոփոխությունների իրավական հիմքը պետք է դնի: Այս մասին այսօր լրագրողների հետ հանդիպմանը տեղեկացրեց ՀՀ արդարադատության փոխնախարար Արամ Օրբելյանը: Իսկ օրենսդրական փոփոխություններին զուգահեռ իրավաբանական անձանց պետական ռեգիստրի գրանցման գործակալություններում կատարվող բարեփոխումները, նրա համոզմամբ, լիովին փոխել են համակարգում նախկինում արմատավորված վարքուբարքը:

Մասնավորապես՝ բիզնես գործունեություն սկսել ցանկացող անձը, ով նախկինում ամիսներով պետք է չարչարվեր իրավաբանական անձ գրանցելու համար, այսօր արդեն կարող է իր տանը նստած նույն գործընթացն իրականացնել` առանց ծանոթ-բարեկամներ փնտրելու և գործակալության «մուննաթը դեմքին» աշխատակցի երեսին նայելու: Ի դեպ, փոխնախարարը տեղեկացրեց, որ գործակալությունում այսուհետ նմանատիպ դեմքով աշխատակիցներ հնարավոր էլ չի լինի գտնել, քանի որ քաղաքացիների հետ քաղաքակիրթ շփման նրբություններին ծանոթանալու համար էլ նրանք դասընթացներ են անցնում:

Ինչ վերաբերում է համակարգային փոփոխություններին` իրավաբանական անձ գրանցելու համար այսուհետ էլեկտրոնային ստորագրության առկայության դեպքում կպահանջվի 10-ից առավելագույնը 20 րոպե, իսկ նույնը իրավաբանական անձանց պետական ռեգիստրի գրանցման գործակալություններում արագ և առանց հերթերի կազմակերպելու համար այս պահին պատուհանների թվաքանակի ավելացման հարցն է լուծվում:

22:47 Հասարակություն | Չորեքշաբթի 22.02.2012