Այսօր լրագրողների հետ հանդիպման ժամանակ ԱԺ ՀՅԴ խմբակցության պատգամավոր Արա Նռանյանը առանձնացրեց կառավարության թվով 8 նախաձեռնություններ, որոնք Հայաստանում վատացրել են սոցիալական վիճակը:
Առաջինը նա հիշատակեց ժամանակավոր անաշխատունակության վերաբերյալ օրենսդրական փոփոխությունները, երկրորդը` նախորդ տարի աշխատանքային օրենսգրքում կատարված այն փոփոխությունը, որը հնարավորություն է տալիս գործատուներին բանավոր աշխատանքի ընդունել և ազատել աշխատողներին:
Մյուսը հարկային օրենսդրությունում կատարված այն փոփոխություններն են, որով ցանկացած 2 փոքր տնտեսվարող կարող են ճանաչվել փոխկապակցված անձ և զրկվել ԱԱՀ չվճարողի կարգավիճակից: Չորրորդ փոփոխությունը «Ժամանակավոր ներմուծում» մաքսային ռեժիմի հետ կապված փոփոխություններն են, մյուսը` փողոցային առևտրականների և Թուրքիայից ու Չինաստանից ներմուծում իրականացնողների համար մաքսային մարմինների հետ կապված խնդիրները, որի արդյունքում, ըստ Նռանյանի, շուտով ՀՀ-ում կթանկանան նաև հագուստն ու կոշիկը:
Աշխատանքային օրենսգրքում փոփոխություններ կատարելու վերջին նախաձեռնությունը, երբ սահմանվեց վեցօրյա աշխատանքային շաբաթ, ըստ Նռանյանի, հնարավորություն է տալիս գործատուներին նոր աշխատողներ ընդունելու փոխարեն «շահագործել» իր աշխատակիցներին:
Յոթերորդ փոփոխությունը ավտոկայանատեղերի հարկերի սահմանմանն էր վերաբերում, որի արդյունքում, ըստ Ա. Նռանյանի, եթե ՀՀ-ում մարդ կար, որ դեռ դժգոհ չէր այս իշխանություններից, ապա այս նախաձեռնությունից հետո էլ կառավարությունից չդժգոհող մարդ չի լինի:
Որպես վերջին նախաձեռնություն՝ Ա. Նռանյանը հիշատակեց կենսաթոշակային փոփոխությունների նախագիծը, որով ավելացվելու է և՛ գործատուների, և՛ աշխատակիցների հարկային բեռը: