Մտավոր սեփականության և հեղինակային իրավունքների խախտման դեպքերը բավական մեծ թիվ են կազմում: Այսօր լրագրողների հետ հանդիպմանը ասաց «Հայ հեղինակ» հեղինակային իրավունքների պաշտպանության հասարակական կազմակերպության տնօրեն Սուսաննա Ներսիսյանը:
«Ոլորտի օրենսդրությունը բավական ուժեղ է, սակայն օրենքի դրույթները չեն գործում: Պետական մարմինների կողմից բավական մեծ գործ է արվել, ԵՄ կողմից խոշոր ծրագիր է մշակվում, որի հիմնական նպատակը խախտված հեղինակային իրավունքների վերականգնումն է: Այս ծրագրի առաջին խնդիրը իրավապահ մարմինների դերի բարձրացումն է:
Ծրագրի շրջանակներում նախատեսված են միջոցառումներ, որոնք բացահայտելու են բոլոր այն միջավայրերը, որտեղ խախտվում են հեղինակային իրավունքները: Կա խախտում` պետք է դրա դեմ միջոցներ ձեռնարկել: Միաժամանակ, իրավիճակը բավական շտկվել է: Վաղն ավելի լավ կլինի, քանի որ խախտումների զոհ դարձած անձինք ու ընկերությունները ակտիվորեն հետամուտ են լինում իրավունքների վերականգնմանը»,- ասաց նա:
Ասուլիսի մյուս բանախոս` իրավաբան Ստեփան Խզրթյանն իր հերթին նկատեց, որ իրավական դաշտն այս առումով բավական զարգացած է, և մնում է միայն ձգտել չշրջանցելու օրենքը:
Նրա խոսքով` հայ հեղինակներն իրենց հերթին խախտում են արտասահմանյան երգիչ-երգչուհիների հեղինակային իրավունքները՝ կրկնօրինակելով նրանց տեսահոլովակների, հագուստների ամենափոքր դետալներն անգամ:
Ռեփեր Հայկոն էլ նշեց, որ հեղինակային իրավունքների պաշտպանության ամենառացիոնալ ելքը երգչի՝ muzon.am կայքէջի գովազդատուներից գումար ստանալն է` այն դեպքում, երբ շարքային ներբեռնողը անվճար հիմունքներով երգ «քաշելիս» ոչ մի գումար էլ պարտավորված չէ վճարել: «Ուրախ եմ, որ հեղինակային իրավունքների պահպանման ոլորտում առաջընթաց է նկատվում»,- ասաց նա: