Ամուլսարի ոսկու հանաքավայրի բաց շահագործման հետևանքով առաջացած թունավոր արտանետումների փոշու մասին այսօրվա դրությամբ շատ բան չենք կարող ասել¸ սակայն Ջերմուկի բնապահպանները վտանգ են տեսնում, որ ոսկու հանքի շահագործման հետևանքով առաջացած թունավոր արտանետումները կարող են հասնել մինչև Ջերմուկ։
Սա արդեն, բացի այն, որ իր բացասական ազդեցությունը կթողնի տեղի բնակչության առողջության վրա, առաջին հերթին կարող է մեծ վնաս հասցնել հանգստարանային Ջերմուկ քաղաքին։
Նշենք, որ հանքի հետախուզման արտոնագիրն ստացել է «Գեոթիմ» ընկերությունը, որը Հայաստանում ներկայացնում է կանադական Lidian International ընկերության շահերը: Ընկերության տվյալներով, հանքավայրը պարունակում է 1.4 միլիոն ունցիա ոսկի (մոտ 40 տոննա):
«Էկոլուր» ՀԿ-ի հարցմանն ի պատասխան «Գեոթիմ» ընկերությունը հավաստիացրել է, որ իրենց գործունեությունը ոչ մի կերպ չի կարող ազդել Ջերմուկի շրջակա միջավայրի վրա։
Սակայն բնապահպաններն այն համոզմունքին են, որ Ամուլսարի ոսկու հանքավայրի բաց շահագործումը իր բացասական անդրադարձը կունենա նաև մոտակա գյուղերի բնության և դրանց բնակիչների առողջության վրա։