Ինչպես հաղորդում է This American Life ռադիոշոուն, իրենց հաջողվել է գտնել Coca-Cola-ի` տասնամյակներ շարունակ գաղտնի պահվող բաղադրատոմսը: Atlanta Journal-Constitution ամսագրում 1979 թ. փետրվարի 8-ին հրապարակվել էր այդ բաղադրատոմսի լուսանկարը: Հաղորդավարները պնդում են, որ վերծանել են վատորակ այդ լուսանկարում պատկերված բաղադրատոմսը:
Ըստ այդմ նշվում է, որ Coca-Cola-ի գաղտնի նյութը, որն օգտագործվում է միլիարդների կողմից սիրված ըմպելիքը պատրաստելիս, Merchandise X7-ն է: Այդ նյութի պատրաստման բաղադրատոմսը գիտեն ընդամենը մի քանի հոգի:
Սակայն նկարի վերծանման արդյունքում պարզվել է, որ ըմպելիքը պատրաստելիս օգտագործվում է կոկայի տերևների խտանյութ, կիտրոնաթթու, կոֆեին, շաքար, ջուր, լայմի հյութ, վանիլ, կարամել, ինչպես նաև հենց Merchandise X7 նյութը: Սա իր հերթին կազմված է սպիրտից, նարնջի ձեթից, կիտրոնի ձեթից, մշկընկույզից, նարնջի ծառի ծաղիկների եթերային ձեթից և դարչնի ձեթից:
Բաղադրատոմսի իսկության հարցը դեռ չի հաստատվել Coca-Cola-ի կողմից, սակայն չի էլ հերքվել: