Երեկ Աստրախանում Հայաստանի, Ռուսաստանի եւ Ադրբեջանի նախագահների եռակողմ հանդիպման արդյունքներով ստորագրված համատեղ հայտարարության մեջ ասված է, որ Հայաստանի ու Ադրբեջանի նախագահները պայմանավորվեցին, որպես առաջին քայլ, անհապաղ ռազմագերիների եւ զոհվածների դիակների փոխանակում կատարել` ԵԱՀԿ Մինսկի խմբի եւ Կարմիր խաչի միջազգային կոմիտեի աջակցությամբ, ինչպես նաեւ այդ մոտեցումներով ղեկավարվել նաեւ հետագայում` այդ հարցերում ելնելով բացառապես հումանիտար բնույթից: Հիշեցենք, որ Ադրբեջանում կա 11 հայ գերի եւ պատանդ` 6 հայ ռազմագերի եւ մեկ ընտանիք` բաղկացած 5 անձից, իսկ Հայաստանում` 3 ադրբեջանցի գերի ու պատանդ: Նախագահները պայմանավորվել են նաեւ զոհվածների դիակների փոխանակություն իրականացնել: Հիշեցնենք, որ ադրբեջանական գերության մեջ վախճանվել էր հայ հովիվ Մանվել Սարիբեկյանը, ով տարօրինակ հանգամանքներում մահացել էր Բաքվի բանտում: Մինչդեռ հայկական կողմում են ադրբեջանցի երկու դիվերսանտների՝ Ֆարիդ Ահմեդովի եւ Ադրբեջանի Ազգային հերոս հռչակված Մուբարիզ Իբրահիմովի դիակները: ՊՆ լրատվական բաժնի ղեկավար Մուշեղ Աղեկյանից փորձեցինք ճշտել, թե երբ տեղի կունենա ռազմագերիների փոխանակումը, ինչին ի պատասխան արձագանքեց, որ չի կարող ասել եւ առաջարկեց Կարմիր խաչի միջոցով ճշտել: