Լոնդոնում կայանալիք 30-րդ Օլիմպիական խաղերին հայ մարզիկները դոպինգի պատճառով որակազրկման խնդիր չեն ունենա. այսօր լրագրողների հետ հանդիպման ժամանակ վստահեցրեց ՀՀ սպորտի և երիտասարդության հարցերի նախարար Հրաչյա Ռոստոմյանը:
Նա հիշեցրեց, որ 2010 թվականին, երբ նոր էր նշանակվել ՀԱՕԿ գլխավոր քարտուղար, իր առաջին գործողություններից մեկն այն էր, որ հակադոպինգային ասամբլեա անցկացվի Հայաստանում: Նպատակը ժամանակակից հակադոպինգային ծառայություններին ծանոթացնելն էր:
«Մենք յուրաքանչյուր մարզիկից նվազագույնը 3 անգամ պարտավոր էինք անալիզ վերցնել, մինչդեռ վերցրել ենք 6 անգամ, ի դեպ` յուրաքանչյուր անալիզը արժե 550 եվրոյին համարժեք դրամ: Մենք նման խնդիր, վստահ եմ, չենք ունենա»,- ասաց նախարարը:
Լրագրողների խնդրանքին` ասել, թե որ տեղում կհայտնվի Հայաստանը, նախարարը պատասխանեց` սպորտում կանխատեսելը, գուշակելն անշնորհակալ գործ է: «Մենք պետք է ամեն տարի ավելի լավ աշխատենք, կարևորն այն է, որ բոլորս հավատանք` յուրաքանչյուր գործի հիմքում ընկած է հավատը: Եթե դու հավատում ես քո արած աշխատանքին, անպայման արդյունքներ կլինեն»,- ասաց Հրաչյա Ռոստոմյանը:
Հանրային հեռուստատեսության սպորտային մեկնաբան Կարեն Գիլոյանն ասաց, որ Հանրային հեռուստատեսությամբ նախատեսվում է 120 ժամ ուղիղ եթերով հեռարձակում իրականացնել: «Մեր մարզիկների բոլոր ելույթները ցուցադրվելու են ուղիղ եթերում: Բռնցքամարտը, ծանրամարտը, ըմբշամարտը, ձյուդոն, թեքվանդոն մեկնաբանվելու են Լոնդոնից: Բացի Հայաստանի մարզիկների մասնակցությունից` ցուցադրելու ենք նաև բասկետբոլ, վոլեյբոլ, լողափնյա վոլեյբոլ, հանդբոլ, ֆուտբոլ, գեղարվեստական մարմնամարզություն, գեղալող և ջրացատկ: Լինելու են նաև օրագրեր, որոնք ներառելու են շատ այլ մրցումներ»,- մանրամասնեց սպորտային մեկնաբանը: