ԱԺ ՀՅԴ խմբակցության քարտուղար Արտյուշա Շահբազյանը, գնահատելով երեկ Աստրախանում կայացած Սարգսյան-Ալիեւ-Մեդվեդեւ հանդիպումը, ասաց. «Առաջընթացի մասին չի կարելի խոսել, պարզապես կարելի է ասել, որ սրանով հաստատվեց ձգտումը` շարունակելու բանակցությունները, մանավանդ վերջին շրջանի լարումներից հետո: Բնականաբար, ձեռք բերված պայմանավորվածություններն էլ վերաբերում են այն գործոններին, որոնք լարվածություն են առաջացրել»:
Իսկ Մեդվեդեւի այն հայտարարությունը, թե դեկտեմբերի սկզբին կայանալիք ԵԱՀԿ գագաթնաժողովից առաջ Հայաստանն ու Ադրբեջանը կարող են հանգել ղարաբաղյան հակամարտության կարգավորման սկզբունքների համաձայնեցված լուծման, ըստ Շահբազյանի, պարզապես ցանկություն է. «Միշտ էլ լինում են նման հայտարարություններ, սակայն սրա մեջ որեւէ գործնական բան չկա, չի դրվել ինչ-որ կոնկրետ գործնական միջոցառումների ծրագիր, որոնց հիման վրա հնարավոր կլիներ ասել, թե դրանք իրականացնելով` Աստանայում մենք կարող ենք ինչ-որ հաջողությունների հասնել: Ավելի շուտ` դա ակնկալիք է, ցանկություն»: