Էլեկտրոնային փոստի կայքերը դառնում են պակաս հայտնի, քանի որ ավելի շատ են սկսել օգտագործվել սոցիալական ցանցերը և բջջային հեռախոսները, որոնք հետզհետե հայտնի փոստային ընկերություններից «խլում են» նրանց թրաֆիկը: Ըստ ComScore հետազոտական խմբի զեկույցի` Google Gmail, Yahoo Mail և Microsoft Hotmail էլեկտրոնային փոստերի այցելուների քանակը 2009թ.-ի նոյեմբերից մինչև 2010թ.-ի նոյեմբերը նվազել է 6%-ով` անցած մեկ տարվա նույն ժամանակահատվածի հետ համեմատած:
ComScore-ի մասնագետները դա պայմանավորում են սմարթֆոնների և էլեկտրոնային այլ սարքերի տարածմամբ, որոնց օգտատերերը փոստը ստուգելու համար կայք մտնելու անհրաժեշտություն չունեն: Միևնույն ժամանակ բջջային հեռախոսների միջոցով էլեկտրոնային փոստ ստուգողների քանակը նույն ժամանակահատվածում ավելացել է 40%-ով, ասվում է զեկույցում:
ComScore-ի մասնագետներն ընդգծում են, որ էլեկտրոնային փոստից ավելի շատ հրաժարվում են երիտասարդները. էլեկտրոնային փոստերի հանրամատչելիությունը 12-17 տարեկանների համար 2010թ.-ի նոյեմբեր ամսին ընկել է 24%-ով` համեմատած 2009թ.-ի նոյեմբերի հետ: Այնուամենայնիվ, այս կայքերի հանդեպ պահանջը 55 տարեկանից բարձր օգտատերերի մոտ աճում է, ասվում է փաստաթղթում:
«Երիտասարդների համար շփման այնպիսի ուղիներ կան, որ դրանց շարքում էլեկտրոնային փոստը հաստատ առաջին տեղում չէ»,- նշել է ComScore-ի վերլուծաբան Էնդրյու Լիփսմանը և ավելացրել, որ նրանց մեծ մասը շփվում է Facebook-ով և sms-հաղորդագրություններով:
