«Առաջին լրատվականն» արդեն տեղեկացրել է, որ Google ընկերությունը մեղադրել է Microsoft-ին` իր որոնողական Bing համակարգի համար Google-ի որոնողական համակարգից տվյալներ գողանալու և օգտագործելու մեջ: Google-ում պնդում էին, որ դա արվել է Microsoft Internet Explorer 8 բրաուզերի միջոցով` ինտերնետ օգտագործողների որոնման տվյալները գողանալու և Bing-ի համապատասխան ծրագրի վրա ուղարկելու միջոցով:
Microsoft-ում շատ կտրուկ են պատասխանել այդ մեղադրանքներին: Ինչպես հայտարարել է Microsoft-ի փոխնախագահ Յուսուֆ Մեհդին՝ «իրենք չենք զբաղվում մրցակիցների տվյալների կրկնօրինակմամբ, քանի որ Microsoft-ում աշխատում են աշխարհի լավագույն ուղեղները, որոնք մշակում են որոնողական համակարգերի բարելավման ծրագրեր: Իսկ մրցակիցների գրագողության մեղադրանքներն ուղղակի վիրավորական են»,- ասել է Յուսուֆը:
Microsoft-ի ղեկավարը նաև հայտնել է, որ Google-ի կողմից ներկայացված մեղադրանքները, երբ Bing-ի միջոցով որոնման արդյունքում ստացված տվյալները ներկայացվել են որպես գրագողություն, քանի որ դրանք համընկել են Google-ի որոնողական համակարգի ներկայացրած տվյալների հետ, պարզապես ձեռնածություններ են նրանց կողմից: Սակայն Յուսուֆը հայտնել է, որ դրանց համընկնումն անխուսափելի է, քանի որ որոնողական համակարգերը կատարելագործման ընթացքում նմանատիպ աշխատանք են կատարում:
Ըստ ComScore-ի` ԱՄՆ որոնողական «շուկայում» Google-ի մասնաբաժինը կազմում է 64.3%, իսկ Microsoft-ինը` 12.0%: