Նոյեմբերին պանիրը հերթական անգամ կթանկանա, այս մասին տեղեկացրեց Հայաստանի ամենախոշոր պանրի արտադրամասերից մեկի` Կալինինոյի «Դուստր Մելանյա» ընկերության տնօրեն Ռուբիկ Հարությունյանը: Նա պանրի թանկացումը բացատրում է մի քանի պատճառահետեւանքային կապերով: Նրա պարզաբանմամբ, պանրի հումքի 90 տոկոսը կաթն է: Փոշի կաթից հնրավոր չէ վաճառքի ենթակա պանիր ստանալ: Հետեւաբար` կաթի աստիճանական թանկացումը բերում է պանրի գների բարձրացման: Բացի այն, որ այս տարի կաթնատվությունը 30 տոկոսով նվազել է, մինչեւ ապրիլ կովերը կաթ չեն տալու, իսկ եղած կաթն էլ գնելու համար արտադրամասերը գնային մրցակցության մեջ են մտնելու: «2000 դրամանոց պանրի մեջ մենք գործ ունեք նաեւ 400 դրամ հարկի հետ: Սրան նաեւ գումարվում են տրանսպորտը եւ մյուս բաղադրիչները, որոնք նույնպես թանկացել են: Իսկ իրականում ինչո՞ւ պանիրը միշտ շուկայում իր իսկական գինը չի ունեցել: Որովհետեւ գյուղացիները միշտ աշխատել են, չարչարանքով վերամշակել են իրենց կաթը եւ առաջարկել են շուկային ավելի էժան պանիր, որն իր ինքնարժեքի հետ «աբսալյուտնի» կապ չի ունեցել, իսկ երբ գյուղացիական պանիրները սկսեցին դուրս մղվել շուկայից, կաթի արդեն իսկական «զակուպ»` առք ու վաճառք տեղի ունեցավ, եւ գյուղացիների մոտ կաթ չմնաց: Արդյունքում` վերջին 1.5 ընթացքում սկսեց գոյանալ արդեն իսկական արտադրական մթերքի գին, որը իսկական «պռամիշլեննի տավառ» է, ոչ թե «կրիստյանսկի», որը սարքվել է առանց ծախսերի, հոգսերի, հարկերի, առանց նյութերի, առանց լիարժեք բաղադրիչների»,- մանրամասնեց Ռուբեն Հարությունյանը եւ ավելացրեց, որ իրեն հատկապես մտահոգում է այն հանգամանքը, որ այսօր արտադրամասերում շատ քիչ քանակությամբ պահեստավորված պանիր կա: Նրա խոսքերով, նախատոնական օրերին շատ հնարավոր է, որ պանիր չլինի, ինչը բում կառաջացնի սպառողների շրջանում: Հետեւաբար, ըստ նրա` ավելի լավ է ինչ-որ տեղ մարդիկ գնից մի քիչ էլ հիասթափվեն, պանիրը չիրացվի, մի փոքր քանակ պահպանվի, որ նախատոնական պանիր մնա: «Հատկապես այն դեպքում, որ այսօր չկա այն կանալը, որտեղից կարող ենք կաթ ստանալ>,- լրացրեց տնօրենը:
