Ըստ Եվրոպայի հայկական միությունների ֆորումի նախագահ Աշոտ Գրիգորյանի՝ Արցախի անկախության հարցի քննարկումը և՛ ԱԺ-ում, և՛ հասարակության մեջ անհրաժեշտ է, սակայն քվեարկել ու որոշում ընդունելն անցանկալի արդյունքների կարող է բերել: Հայաստանն անկասկած պետք է ճանաչի Արցախի անկախությունը, սակայն հատուկ իրավիճակի և կամ միայն հարցի լիովին նախապատրաստական աշխատանքները տանելու դեպքում: Ըստ Ա.Գրիգորյանի՝ վերոհիշյալ պայմանները, որոնց դեպքում Հայաստանն անմիջապես պետք է ընդունի Արցախի անկախությունը հետևյալն են.
1. Ադրբեջանը կազմակերպում է հարձակում Արցախի վրա կամ որևէ խոշոր սադրանք:
2. Հայաստանը պայմանավորվում է Ռուսաստանի հետ` փոխադարձաբար ճանաչել Աբխազիայի, Հարավային Օսիայի ու Արցախի անկախությունները:
3. Համաշխարհային հայկական լոբինգը և ՀՀ ԱԳՆ-ն վարում են արդյունավետ և տևական աշխատանք հայամետ պետություններում, ինչպես նաև համանման խնդիրներ ունեցող երկրներում` նրանց նախապատրաստելով Հայաստանի հետ կամ Հայաստանից անմիջապես հետո Արցախի անկախության ընդունմանը:
Հնարավոր է նաև իրականացնել վերոհիշյալ տարբերակներից երկուսի կամ երեքի միաժամանակյա կատարումը: Այդ նպատակով անհրաժեշտ է երկրորդ և երրորդ դրույթների շուրջ աշխատանքների ինտեսիվացում:
Ինչպես արդեն հայտնել ենք, ԵՀՄՖ-ը վարում է ակտիվ աշխատանքներ Եվրոպայում Արցախի անկախությունն ընդունելու համար հայաստանամետ երկրների հետ: Ցանկլալի է, որ այս գործին լծվի և Հայաստանի ԱԳՆ-ն: Ըստ պարոն Գրիգորյանի՝ եկող տարվա ընթացքում կարելի է սպասել ցանկալի արդյունքներ, որի հետևանքով Ադրբեջանի դիրքորոշումը և վարվող քաղաքականությունն Արցախի հարցում կտրուկ փոփոխության է ենթարկվելու: Ամենայն հավանականությամբ արդյունքում Ադրբեջանը կատարելու է սխալ քայլ, որից օգտվելով՝ Հայաստանն անմիջապես ընդունելու է Արցախի անկախությունը: