Գագիկ Բեգլարյանը հերթական մարդուն է ծեծել, այս անգամ՝ չունենալով պաշտոնական որևէ կարգավիճակ: Այսինքն՝ Բեգլարյանն արդեն սկսել է ծեծել ազատ, բայց պատասխանատու ռեժիմում: Պատասխանատու այն առումով, որ առաջիկա ընտրություններում իշխանությունները նրանից ու նրա շրջապատից որոշակի ակնկալիքներ ունեն: Եվ ահա, Բեգլարյանն ու իր շրջապատը մարզվում են: Նրանց մարզանքի օբյեկտն այս անգամ եղել է Արթուր Բաղդասարյանի օգնականը՝ ինչպես գրում է «Հայկական Ժամանակը»: Այսինքն՝ իշխանությունները մի կողմից փորձում են ՕԵԿ-ին ցույց տալ, որ ոչ միայն «կարկանդակով կեցցե մարդ», այլ նաև «ծեծիվ Գագոյի», ինչպես նաև փորձում են ստուգել, թե արդյոք Գագիկ Բեգլարյանը պահպանում է իր մարզավիճակը:
Իսկ Բեգլարյանը ոնց որ թե վատ մարզավիճակում չէ: Երևի թե հենց դա է լինելու նրա ստեղծելիք «երևանցիների» կուսակցության առաքելությունը: Այսինքն՝ «երևանցիները» Չոռնի Գագոյի գլխավորությամբ ծեծելու են բոլոր այն երևանցիներին, ովքեր ընտրություններում կհայտնվեն իշխանությունների ճանապարհին: Իսկ որպես նախավարժանք էլ ընտրվել են ՕԵԿ-ական օբյեկտները, երևի թե հայտնի ռուսական ասույթի տրամաբանությամբ` «խփիր յուրայիններին, որ օտարները վախենան»: Ի վերջո, Գագիկ Բեգլարյանն ինքն էլ երևի թե հենց այդ տրամաբանության զոհը դարձավ, երբ պաշտոնանկ եղավ: Իսկ եթե լուրջ, ապա Չոռնի Գագոյի հերթական արկածը վկայում է, որ Հայաստանը հեռու է իրավական երկիր լինելուց, և այստեղ իշխանության ամեն քայլը միայն խորացնում է անպատժելիությունը: Բանն այն է, որ իրավական երկրում Գագիկ Բեգլարյանը պետք է նախագահական աշխատակազմի աշխատակցին ծեծելու համար պատասխան տված լիներ օրենքի, ոչ թե նախագահական նստավայրի առաջ: Օրենքի առաջ պատասխան տալու դեպքում Բեգլարյանը կհասկանար, որ ոչ թե միայն նախագահականի անդամներին չի կարելի ծեծել, այլև չի կարելի մարդ ծեծել ընդհանրապես, որովհետև դա քրեորեն հետապնդելի արարք է: Բայց նաև հասկանալի է, որ իշխանություններին Գագիկ Բեգլարյանի իրավագիտակցությունը չէ հարկավոր, այլ անպատժելիության զգացումը: Այդ զգացումով է Բեգլարյանը ընտրությունների ժամանակ արժեքավոր և էֆեկտիվ գործոն:
