Ինչպես հաղորդում է Reuters գործակալությունը, Իսրայելի բանակի հետախուզական բաժնի նորընտիր հրամանատար Ավիվ Քուչավին հայտարարել է. «Պատժամիջոցները չեն կարողացել կասեցնել Իրանի միջուկային աշխատանքները, և այդ երկիրը մինչև երկու տարի ատոմային ռումբ է ձեռք բերելու: Հարցն այն չէ, թե իրանցիները ե՞րբ ատոմային ռումբ կունենան, կարևորն այն է, թե ինչքա՞ն ժամանակ է մնացել, մինչև Իրանի առաջնորդը ուրանի գերհարստացման գործողությունը սկսելու հրաման արձակի: Նկատի ունենալով Իրանի ունեցած ուրանն ու տեխնոլոգիաները՝ երկրի առաջնորդի հրամանից մեկ կամ երկու տարի հետո Իրանը կարող է ատոմային ռումբ պատրաստել»։
Քուչավիի հայտարարությունը արվում է այն դեպքում, երբ մոտ մեկ ամիս առաջ Իսրայելի «Մոսադ»-ի՝ արդեն թոշակի անցած ղեկավար Մեյեր Դագանը հայտարարել էր, թե իրանական ատոմակայաններում առաջացած խնդիրների հետևանքով Իրանը առաջիկա չորս տարիների ընթացքում ատոմային ռումբ պատրաստելու հնարավորություն չի ունենա:
Փորձագետների կարծիքով, իսրայելական երկու կարևոր կենտրոնների իրարամերժ հայտարարությունների գլխավոր պատճառը «Մոսադ»-ի և «Աման»-ի (բանակի հետախուզական բաժին) միջև գոյություն ունեցող մրցակցությունն է: