Հովիկ Աբրահամյանը լրագրողների հետ ճեպազրույցում ասաց, թե ինքն առաջարկել էր «Ժառանգություն» խմբակցությանը մինչեւ ԼՂՀ անկախության ճանաչման մասին հարցը խորհրդարանի օրակարգ մտցնելը համաձայնեցնեն կոալիցիոն քաղաքական ուժերի հետ: «Իրենք չլսեցին իմ հորդորը եւ օգտվելով կանոնակարգ օրենքով իրենց տված հնարավորությունից՝ մտցրին օրակարգ այդ նախագիծը: Հիմա կոալիցիան, մեր արտաքին գերատեսչության ղեկավարությունը գտնում են ոչ նպատակահարմար այսօր այդ հարցը ընդունելու համար: Թող ոչ մեկը չփորձի համոզել կամ որեւէ մեկի մոտ ստեղծել մի տպավորություն, որ կոալիցիոն ուժերը չեն ուզում, նախագահը, ԱԳ նախարարը, ԱԺ նախագահը չեն ուզում, որ անկախությունը մենք ճանաչենք: Ուղղակի մենք փորձում ենք՝ այդ ճանաչելով չխաթարել այն բանակցությունները, որոնք այսօր ընթանում են ԵԱՀԿ ՄԽ համանախագահների միջոցով, և մենք ուզում ենք, որ այդ խնդիրը լուծվի խաղաղ բանակցությունների արդյունքում։ Չենք ուզում որևէ քայլ կատարել, որը կխանգարի այդ բանակցություններին: Իսկ որ պահին, որ քննարկենք ընդհանուր, երկրի նախագահի գլխավորությամբ որոշենք, որ պետք է ճանաչենք Ղարաբաղի անկախությունը դե յուրե, անպայման մենք շատ արագ կնախաձեռնենք ու արտահերթ նիստով կարող ենք դա անել»,- ասաց նա: Ի դեպ, ըստ Աբրահամյանի, եթե Աստրախանում կայանալիք Սարգսյան-Ալիեւ վաղվա հանդիպումից հետո Սերժ Սարգսյանն առաջարկի ընդունել, ճանաչել անկախությունը, ապա դա կանեն «մեծ սիրով»:
