Արդեն մեկ տարի է, ինչ Հայաստանից ձուկ եւ խեցգետին է արտահանվում Ռուսաստան եւ Վրաստան: Սակայն ներկա դրությամբ աշխատանքներ են տարվում հայկական ձկնատեսակները եվրոպական երկրներ արտահանելու ուղղությամբ: Գյուղնախարարության մամուլի քարտուղար Վահագն Մարտիրոսյանի հավաստմամբ, անցյալ տարի Ռուսաստանից Հայաստան էին ժամանել Կալինինգրադի մարզի ներկայացուցիչներ, եւ նրանց հետ պայմանավորվածություն ձեռք բերվեց հայկական ձկնամթերքը Կալինինգրադի մարզ արտահանելու մասին, որն այսօր ընթացքի մեջ է: Իսկ թե ինչով է մեր ձկնատեսակը գրավում օտարերկրացիներին, մամուլի քարտուղարը պարզաբանեց. «Որովհետեւ մեզ մոտ լճակային տնտեսությունները շատ մաքուր ջրից են, եւ այդ շատ մաքուր ջրի մեջ արտադրվող ձուկը, իրենց կարծիքով, էկոլոգիապես մաքուր է»: Գյուղատնտեսության աշխատակազմի անասնաբուծության եւ տոհմային գործի վարչության պետ Աշոտ Հովհաննիսյանն էլ տեղեկացրեց, որ արտերկիր Հայաստանից արտահանվում է հիմնականում թառափազգիներից` թառափ ձկնատեսակը, սահմանազգիներից` ծիածանափայլ իշխանը, գետիշխանը կամ կարմրախայտը եւ մասամբ նաեւ` Սեւանի իշխանի գեղարքունի ձկնատեսակը: Ի դեպ, ըստ Աշոտ Հովհաննիսյանի` թե՛ թառափազգիները, թե՛ սահմանազգիները համարվում են բարձր ապրանքային արժեք ունեցող ձկնատեսակներ եւ մեծ պահանջարկ ունեն աշխարհում:Սակայն դեռեւս Հայաստանից Եվրամիություն հնարավոր չէ ձկնատեսակներ արտահանել, քանի որ չունեն արտահանման համարանիշ: Բայց եւ այնպես, ներկա դրությամբ աշխատանքներ են տարվում եվրոպական երկրներ ձուկ արտահանելու ուղղությամբ: Այն հարցին, թե Հայաստանը ներուժ ունի՞ նման մեծ ծավալների արտահանման համար, Աշոտ Հովհաննիսյանը պատասխանեց. «Մենք հիմա արտադրում ենք 5400 տոննա ձուկ, որից արտահանվում է մի քանի հարյուր տոննան: Բայց կարող ենք մի քանի ամիսների ընթացքում ուղղակի կրկնապատկել արտահանման ծավալները»: