Հերթական սենսացիոն բացահայտումն են արել հայ հնագետները: Հինգհազարամյա կոշիկից հետո նույն գոտում` Վայոց Ձորի մարզի Արենի-1 քարանձավային համալիրում, գտնվել է վեցհազարամյա (մ.թ.ա. 3900-3600 թթ.) եղինջե շոր: Այս մասին «Новости-Армения» գործակալությանը հայտնել է հայկական արշավախմբի ղեկավար Բորիս Գասպարյանը:
Արենի-1-ում պեղումներն իրականացվում են Կալիֆոռնիայի (ԱՄՆ) և Քըրքի (Իռլանդիա) համալսարանների հնագետների հետ համատեղ:
«Այս գտածոն եզակի հնարավորություն է ընձեռում պատկերացում կազմելու ոչ միայն էնեոլիթի դարաշրջանի մարդկանց հագուստի, այլև այդ ժամանակների արհեստներ, մասնավորապես` վեց հազար տարի առաջ տեքստիլի արտադրության վերաբերյալ»,- լրագրողներին ասել է Գասպարյանը:
Նրա խոսքերով, պեղումների ժամանակ հայտնաբերվել են նաև եղինջի թելեր, ինչպես նաև զամբյուղներ, որոնք, ամենայն հավանականությամբ, մանկական օրորոցներ են եղել: Հայտնաբերված իրերի թվում են նաև եղինջե գործվածքով լաթեր, որոնց վրայի նախշերին հաճախ կարելի է հանդիպել հայկական գորգերում մինչև օրս:
