Հայաստանում 2011-2012թթ. մակրոտնտեսական կայունության տեսակետից 31 կետով հետընթաց է գրանցվել: Այս ցուցանիշն այսօր հրապարակվեց Հայաստանի ազգային մրցունակության զեկույցի ներկայացման ժամանակ:
Զեկույցի հեղինակի՝ «Տնտեսություն և արժեքներ» հետազոտական կենտրոնի ղեկավար Մանուկ Հերգնյանի խոսքով՝ հետընթաց է գրանցվել նաև առողջապահության և տարրական կրթության ոլորտում` 19 կետով, բարձրագույն կրթության և վերապատրաստման ոլորտում` 3-ով, ապրանքային շուկայի արդյունավետության` 23-ով, տեխնոլոգիական պատրաստվածության առումով` 1-ով, շուկայի չափով` 15-ով, գործարարության կատարելագործվածության` 34-ով, նորարարության` 46-ով: Մյուս ոլորտներում որոշակի առաջընթացի արդյունքում ՀՀ ընդհանուր մրցունակությունը բարելավվել է 6 կետով` 98-րդ տեղից (139 երկրների մեջ) բարձրանալով 92-րդ տեղ (142 երկրների մեջ):
Վարչապետ Տիգրան Սարգսյանը ընդմիջեց զեկուցողին և հայտարարեց, որ մակրոտնտեսական միջավայրի վատթարացումը պայմանավորված էր ընդլայնողական քաղաքականությամբ, մինչդեռ կառավարությանը մեղադրում են կրճատողական քաղաքականություն վարելու մեջ:
«Այդ մարդիկ երևի տնտեսագիտությունից շատ հեռու են և քաղաքական դաշտում անգրագետ հայտարարություններ են անում»,- հայտարարեց Տ. Սարգսյանը` նշելով, որ էապես ավելացրել են պետական բյուջեի դեֆիցիտը, արտաքին պարտքի հաշվին ենթակառուցվածքների զարգացման ծրագրեր են իրականացնում, և իրենց զգուշացնում էին, որ ընդլայնողական քաղաքականությունը պետք է բերի գնաճային ճնշումների:
«Ակնհայտ էր, որ մենք վարում ենք ընդլայնողական քաղաքականություն: Հիմա մեզ մեղադրում են կրճատողական քաղաքականություն վարելու մեջ: Նոնսենս է: Հանրությանը չի կարելի թյուրիմացության մեջ գցել: Հասկանում ենք, որ ուզում են իշխանությանը քննադատել, բայց չափ ու սահման կա. ո՞նց կարելի է սևը սպիտակի տեղ ներկայացնել»,- իր վրդովմունքը հայտնեց վարչապետը: