Թուրքիայի ազգային հետախուզական կազմակերպությունը (MİT) գրավոր հաղորդագրություն է ուղարկել պոսլահայ ականավոր գործիչ, «Ագօս» թերթի խմբագրապետ Հրանտ Դինքի սպանության գործը քննող դատարան, որում նշված է, որ Դինքին կանչել են Ստամբուլի նահանգապետարան, եւ «MİT»-ի աշխատակիցը նրան խորհուրդ է տվել զգուշանալ: «Նահանգապետարանում տեղի ունեցած հանդիպման ժամանակ խորհրդատվական բնույթի տեղեկություն է եղել: Դինքին նախազգուշացվել է, որ Սաբիհա Գյոքչենի վերաբերյալ գրած իր հոդվածը կարող է հասարակական զայրույթի պատճառ դառնալ»,- տեղեկացվում է ««MİT»-ի հաղորդագրությունում: Միևնույն ժամանակ նշվում է, որ անվտանգության աշխատակիցները Դինքի հնարավոր սպանության մասին ոչ մի տեղեկություն կանխավ չեն ստացել: Այս մասին հայտնում է թուրքական Haberler լրատվական կայքը:
Հիշեցնենք, որ Հրանտ Դինքը սպանվել է 2007-ի հունվարի 19-ին Ստամբուլի Շիշլի թաղամասում գտնվող «Ագօս» թերթի խմբագրատան առջեւ: Մարդու իրավունքների եվրոպական դատարանը մեղավոր է ճանաչել Թուրքիային մարդու իրավունքների հռչակագրի 2-րդ (կյանքի իրավունք) եւ 10-րդ (խոսքի ազատություն) հոդվածների ոչ պատշաճ ապահովման մեջ, ինչի հետեւանքով էլ սպանվել է Դինքը:
