1933թ. այս օրը Կ.Պոլսում ծնվեց բառարանագիր Բարսեղ Թուղլաճյանը: Թուրքական մամուլում և գրականության մեջ Թուղլաճյանը տպագրվել է Փարս Թուղլաչի գրական անունով:
Սովորել է Կիպրոսի Մելքոնյան վարժարանում: Բարձրագույն ուսումն ստացել է ԱՄՆ-ում, աշխատել է Անկարայի զինվորական ակադեմիայում՝ որպես անգլերենի և ֆրանսերենի դասախոս։
1961թ. հրատարակել է «Անգլերեն-թուրքերեն ոճերի և ասույթների բառարան», որը մեծ ընդունելություն է գտել, արժանացել մի քանի տպագրության: Կազմել է «Անգլերեն-լատիներեն-թուրքերեն բժշկական բառարանը, 1965թ. լույս ընծայել «Անգլերեն-ֆրանսերեն-թուրքերեն իրավաբանական և տնտեսական բառարանը», որը պարունակում է 80.000 բառ:
Կատարել է թարգմանություններ ֆրանսերենից հայերեն, տպագրել է վիպակներ պատմվածքներ: Թուղլաճյանի պատմաբանասիրական հետաքրքրությունների մեջ կարևոր տեղ է գրավում «Օսմանյան ճարտարապետության արևմտականացման ժամանակաշրջանն ու Պալյան ընտանիքը» (1982թ.) ծավալուն աշխատությունը, որտեղ նա վեր է հանել ճարտարապետների մեծ ու հռչակված Պալյան գերդաստանի մի քանի սերնդի պատմությունը Օսմանյան կայսրության ճարտարապետական արվեստի զարգացման պատմության մեջ:
Թուղլաճյանի աշխատությունների մեջ հայկական իրականությանը վերաբերող գործերից մեկն էլ «Այվազովսկին Թուրքիայում» (1983թ.) գիրքն է (նույնպես թուրքերեն):
Թուղլաճյանի՝ հայկական թեմաներով գործերից են նաև «Պոլսի Իշխանաց կղզիները պատմության ընթացքում» (1989թ.) և «Իսթանպուլի հայոց եկեղեցիները» (1991թ.) գրքերը՝ հայերեն, թուրքերեն և անգլերեն:
1970-1980-ականներին Թուղլաճյանն իր բանասիրական հետաքրքրությունների համար քանիցս այցելել է Երևան։