Ինչպես նշել էինք, սոխի բերքի սակավության պատճառաբանությամբ սոխի գինը այս շաբաթ արդեն 250 դրամից հասել է 500 դրամի: Արձագանքելով գյուղատնտեսական շուկայում գլուխ բարձրացված թանկացումներին՝ Սպառողների իրավունքների պաշտպանության ՀԿ-ի նախագահ Աբգար Եղոյանը նկատեց.«Ես չեմ կարողանում ընդունել այդ պատճառաբանությունները: Գիտեք ինչ, մի օր էլ այդ ձեւով կասեն՝ բնակլիմայական պայմանները լավ չէին այդ պատճառով աշխատավարձերը կրճատվեցին: Կարելի է ամեն ինչին պատճառ գտնել, բայց մի բան փաստ է, որ մեր երկրում մթերքները օր օրի թանկանում են, իսկ աշխատավարձերը մնում են նույնը: Այդ պատճառով ես արդեն չգիտեմ, թե ինչ մեկնաբանություն տամ: Տեսեք՝ սոխի շուկայում մենաշնորհ չկա, գերիշխող դիրք չկա, բայց Հայաստանում մի մեխանիզմ է աշխատում, որով մարդիկ կարողանում են գին պահել, եւ դա հստակ երեւում է:
