«Ագօս» թերթի խմբագրապետ Հրանտ Դինքի սպանության գործով Ստամբուլի դատարանում կայացած 15-րդ դատալսմանը ներկա են գտնվել նաև սպանվածի ընտանիքի անդամները: Դատավարությանը մասնակցել են հարուցված քրեական գործով կասկածյալ անցնող Օգյուն Սամասթը, Էրհան Թունջելին, Յաիսն Հայալը եւ Ահմեդ Իսքենդերը: Ըստ «CnnTurk»-ի` սպանության գործողության մեջ մեղադրվող Սամասթի փաստաբան Լևենթ Յլդրըմը դատարանից պահանջել է իր պաշտպանյալի գործերն ուղարկել Ստամբուլի անչափահասների հարցերով զբաղվող դատարան: Պատճառաբանությունը եղել է այն, որ սպանության կատարման ժամանակ Սամասթը դեռ 18 տարեկան չկար: Փաստաբանի պահանջը բավարարվել է: Այն պահին, երբ դատավորի հրահանգով ոստիկանները Սամասթին դուրս են տարել դատարանի դահլիճից, Հրանտ Դինքի եղբայրը` Խոսրով Դինքը, դիմելով դատավորին, ասել է. «Եթե արդարությունը գործեր, այսպես չէր լինի: Հիշեցնում եմ, որ ձեզ վրա մեծ պատասխանատվություն կա ընկած: Անցել է արդեն չորս տարի»:
