Ինչպես հաղորդում է Fox News-ը, եվրոպական Airbus ավիաընկերությունը 2010 թ. արդյունքներով զգալիորեն առաջ է անցել իր ամերիկյան մրցակից Boeing ընկերությունից: Այդ ցուցանիշները գերազանցվել են թե՛ պատրաստի ինքնաթիռների վաճառքի և թե՛ պատվերների առումով. Airbus-ն անցած տարի պատվիրատուներին է հանձնել 510 ինքնաթիռ, ստացել է 574-ի պատվեր: Boeing-ի ցուցանիշները համապատասխանաբար 462 և 530 են:
Այս տվյալները հեռուստաընկերությունը մեջբերում է եվրոպական ավիակոնցեռնի հրապարակած զեկույցից:
Airbus-ն անցած տարի գերազանցել է 2009 թվականի իր իսկ ռեկորդը՝498 ինքնաթիռ։ Չնայած տնտեսական ճգնաժամին և մի շարք ընկերությունների՝ պատվերներից հրաժարվելու փաստին, Airbus-ի պատվերները 2010 թ. զգալիորեն գերազանցել են 2009 թ. ցուցանիշները` 574-ը 271-ի դիմաց: Պատվերների ընդհանուր գումարը կազմել է 74 մլրդ դոլար: Սա բազային գների հաշվարկով է, ներառված չեն լրացուցիչ հագեցվածության գումարները:
Կայքը նաև տեղեկացնում է, որ այս պահին Airbus ընկերության ունեցած ընդհանուր պատվերների թիվը հավասար է 3552 ինքնաթիռի, որոնց ընդհանուր գումարը 480 մլրդ դոլար է: Սա թույլ է տալու ընկերությանը ողջ հզորությամբ գործել առնվազն առաջիկա 6 տարիների ընթացքում: