Ինը միջազգային լրագրողական կազմակերպություններ Ադրբեջանում նոյեմբերի 7-ին տեղի ունենալիք խորհրդարանական ընտրությունների շեմին «Կարծիք արտահայտելու ազատությունն Ադրբեջանում վտանգված է» թեմայով զեկույց են հրապարակել, որտեղ ասվում է, որ Ադրբեջանը չի կատարում արտահայտման ազատությունն ապահովելու գործում ստանձնած միջազգային պարտավորությունները: «Ազադլիգ» ռադիոկայանի համաձայն` զեկույցի հեղինակներից «Article 19» կազմակերպության գործադիր տնօրենն այդ կապակցությամբ ասել է. «Լրագրողների վրա հարձակվողները համոզված են, որ դրա համար Ադրբեջանում ոչ ոք իրենց չի պատժելու: Ադրբեջանում առկա վախի և անպաշտպանվածության մթնորոտի պատճառը նման հանցագործությունների չբացահայտումն է», եւ վախի այդ մթնորոտը խիստ անցանկալի է նոյեմբերի 7-ին անցկացվելիք խորհրդարանական ընտրությունների համար: Զեկույցը պատրաստվել է ս.թ. սեպտեմբերին Ադրբեջան այցելած առաքելության հավաքած փաստերի հիման վրա: Փաստաթղթում Ադրբեջանի կառավարությանը խորհուրդներ են տրվում եւ նշվում է, որ վախի մթնոլորտը երկրում վերացնելու եւ արտահայտման ազատությանը նպաստող պայմաններ ստեղծելու համար կառավարությունը պետք է ապահովի լրագրողների դեմ իրագործված հանցագործությունների արդարացի հետաքննությունը, ազատ արձակի ձերբակալված լրագրողներին ու բլոգերներին, վերացնի զրպարտության եւ վիրավորանքի համար քրեական պատասխանատվություն նախատեսող օրենքների նորմերը: Զեկույցը պատրաստել են Ադրբեջանի գծով Միջազգային համագործակցության խումբ ստեղծած հետեւյալ կազմակերպությունները` «Articlle 19», «Freedom House», «Indexon Censorship», «International Federation of Journalistis», «Media Diversity Institute», «Open Society Foundations», «Press Now», «Reporters Without Borders», «World Association of Newspapers and News Publishers»: