AZE.az գործակալությանը տված հարցազրույցում ադրբեջանցի քաղաքագետ Մուբարիզ Ահմեդօղլուն նշել է, որ Ադրբեջանը չի ընդունել «սանկտպետերբուրգյան» առաջարկությունները, քանի որ այդ ժամանակ խոսվում էր Հայաստանում ռուսական ռազմաբազայի ներկայության ժամկետը երկարաձգելու մասին»: Նա նաեւ հավելել է, որ Բաքվում ՌԴ նախագահ Մեդվեդեւը պարզաբանել է այդ առթիվ պաշտոնական դիրքորոշումը: Ահմեդօղլուն մինչ այդ անդրադարձել է Ռուսաստանի կողմից Ադրբեջանին հարձակողական Պիոն զինատեսակ վաճառելու իրողությանը եւ պարզաբանել, որ «դա ցույց է տալիս, որ ՌԴ-ն Ղարաբաղյան հակամարտության հարցում այլ մոտեցում ունի, քան հարավօսականի դեպքում»: Ադրբեջանցի քաղաքագետն առաջարկում է մերժել Մադրիդյան եւ Նորացված մադրիդյան սկզբունքները, եւ միջնորդների նախապատրաստած ու Ադրբեջանի կողմից ընդունված առաջարկություններն անվանվել «Ստեփանակերտ/Խանքենդի սկզբունքներ»:
Ահմեդօղլուն եւս մեկ անգամ ընդգծել է Ադրբեջանի ռազմական ծախսերի կրկնապատկումը, հարձակողական զինատեսակների ձեռքբերումը եւ անցագրային ռեժիմի խստացումը: Ավելի վաղ նա ասել էր, որ դա նշանակում է, որ Ադրբեջանը նախապատրաստվում է պատերազմի: Մինչ այդ, սակայն, Ահմեդօղլուն նկատել է տվել, որ հերթական եռակողմ հանդիպման նախաձեռնությամբ Մեդվեդեւը հանդես է եկել Սարկոզիի եւ Մերկելի հետ անցկացրած քննարկումներից հետո եւ մատնանշել, որ այդ ընթացքում ՌԴ նախագահը «հետխորհրդային տարածքի սառեցված հակամարտությունների» մասին արտահայտվել է այս կտրվածքով` «ՌԴ-ն դրանք լուծելու ուժ ունի»:
