Աստանայում կայացած ԵԱՀԿ գագաթնաժողովից հետո ղարաբաղյան հիմնահարցի վերաբերյալ խոսակցությունները դադարել են և այս հարցի շուրջ որևէ ակտիվ քննարկում դեռևս չկա: «Առաջին լրատվականի» հետ զրույցում Ռազմավարական և ազգային հետազոտությունների հայկական կենտրոնի տնօրեն Ռիչարդ Կիրակոսյանը կարծիք հայտնեց, որ 2010-ին դիվանագիտական իմաստով մենք չտեսանք որևէ իրական շարժ կամ հարցի լուծում և միգուցե չենք տեսնի նաև այս տարի. «Խնդիրը Մինսկի խմբի մեջ չէ, խնդիրը Ադրբեջանն է: Մինչև Ադրբեջանը չգիտակցի, որ պետք է բաց թողնի Ղարաբաղը, դիվանագիտորեն ոչ մի իրական առաջընթաց այս խնդրում չի լինի: Ղարաբաղյան հիմնահարցի երկու կողմերը շատ հեռու են միմյանցից, և վտանգը դիվանագիտությունից չի գալիս, այլ այնտեղից, որ 2011-ին Ադրբեջանը վերջնականապես հետ կկանգնի դիվանագիտությունից, ինչն էլ կհանգեցնի ռազմական գործողությունների և վաղ պատերազմի»:
Կիրակոսյանը չափազանց միամիտ գնահատեց այն կարծիքները, թե միջազգային հանրությունը թույլ չի տա, որպեսզի ղարաբաղյան հարցը լուծվի պատերազմական ճանապարհով:
«Խնդիրն այն է, որ ինչպես ռուս-վրացական պատերազմի ժամանակ, այնպես էլ այս դեպքում, միջազգային հանրության համար չափազանց դժվար է կանխել պատերազմը: Եթե միջազգային հանրությունը ցանկանում է կանխել պատերազմը, նա ավելին պետք է անի, նրանք պետք է այլևս հրթիռներ չտրամադրեն Ադրբեջանին: Եթե միջազգային հանրությունը իրապես չի ուզում, որ տարածաշրջանում պատերազմ լինի, ապա պետք է ավելի ուժեղ մեսիջ ուղարկի Ադրբեջանին»,- ասաց Ռիչարդ Կիրակոսյանը և հավելեց, որ պատերազմը հիմնականում պատահաբար է գալիս և հիմնված չի լինում ո’չ ռազմական տրամաբանության, ո’չ էլ պատերազմ հայտարարելու վրա:
