Ֆուտբոլի Հայաստանի ազգային հավաքականն այսօր (ՖԻՖԱ-ի օրացույցով ընկերական հանդիպումների պաշտոնական օրը) Կիպրոսի Լիմասոլ քաղաքում` «Ցիրիոն» մարզադաշտում, ընկերական հանդիպում է անցկացնում Կանադայի ընտրանու հետ:
Արդեն 5-րդ րոպեին անկյունայինի խաղարկումից հետո Քևին Մաքկենան գլխի դիպուկ հարվածով գրավեց Ռոման Բերեզովսկու պաշտպանած դարպասը, որից անմիջապես հետո մեր ընտրանին տիրեց նախաձեռնությանը: Յուրա Մովիսիյանն ու Հենրիխ Մխիթարյանը մեկական շեղ հարված կատարեցին:
23-րդ րոպեին Մարկոս Պիզելլին միջին տարածությունից կատարած ուժգին հարվածով վերականգնեց հաշվի հավասարակշռությունը: Մեր հավաքականը շարունակում էր պրեսինգի դիմել: 43-րդ րոպեին Յուրա Մովսիսյանը մոտ էր այդ խաղում Հայաստանի ընտրանու երկրորդ գնդակը խփելուն, սակայն գերազանց խաղաց կանադացիների դարպասապահ Միլան Բորյանը: Այսպիսով` առաջին խաղակեսն ավարտվեց 1:1 հաշվով:
Ըստ ՀՖՖ պաշտոնական կայքի` թիմերը խաղադաշտ էին դուրս եկել հետևյալ կազմերով`
ԿԱՆԱԴԱ` 1. Միլան Բորյան, 2. Նիկ Լեջերվուդ, 3. Մայկ Կլուկովսկի, 4. Քևին Մաքկենա, 13. Ատիբա Հատչինսոն, 10. Սիմեոն Ջեքսոն, 5. Ադամ Ստրայթ, 6. Ջուլիան Դեգուզման, 15. Դավիդ Էդգար, 11. Ջոշ Սիմպսոն, 9. Տուսեն Ռիկետս
ՀԱՅԱՍՏԱՆ` 1. Ռոման Բերեզովսկի, 4. Սարգիս Հովսեփյան, 16. Վալերի Ալեքսանյան, 15. Հրայր Մկոյան, 17. Արտակ Եդիգարյան, 7. Արթուր Եդիգարյան, 18. Հենրիխ Մխիթարյան, 23. Արաս Օզբիլիս, 20. Լևոն Հայրապետյան, 14. Յուրա Մովսիսյան, 8. Մարկոս Պիզելի: