Կիպրոսի Լիմասոլ քաղաքում` «Ցիրոն» մարզադաշտում, ավարտվեց ֆուտբոլի Հայաստանի ազգային հավաքականի` 2012 թվականի առաջին ընկերական հանդիպումը: Մեր ընտրանին 0:2 հաշվով պարտվեց Սերբիայի ազգային թիմին: Նշենք, որ Վարդան Մինասյանը խաղադաշտ էր դուրս բերել մի շարք երիտասարդ խաղացողների, որոնց գործի մեջ տեսնելը մեծ օգուտ կբերի հավաքականին` պաշտոնական խաղերում կազմի ընտրության ժամանակ:
15-րդ րոպեին «Մանչեսթեր Սիթի»-ի պաշտպան Ալեքսանդր Կոլարովի կատարած հարվածից հետո Գրիգոր Մելքսեթյանը ետ մղեց գնդակը, իսկ պաշտպանների հսկողությունից դուրս մնացած Զդրավկո Կուզմանովիչը բացեց հանդիպման հաշիվը:
30-րդ րոպեին Բոշկո Յովանովիչի` տուգանայից կատարած հարվածից հետո Գրիգոր Մելիքսեթյանը գնդակը հրամցրեց «Չելսի»-ի պաշտպան Բրանիսլավ Իվանովիչին, ով երկրորդ անգամ գրավեց մեր ընտրանու դարպասը:
Երկրորդ խաղակեսի 76-րդ րոպեին Վալտեր Պողոսյանը կորցրեց հաշվի տարբերությունը կրճատելու ամենաիրական հնարավորությունը` մոտ տարածությունից չկարողանալով գրավել մրցակցի անպաշտպան դարպասը:
Կիպրոսում Հայաստանի ազգային հավաքականի հաջորդ հակառակորդը կլինի Կանադայի ընտրանին: Խաղը կկայանա Երևանի ժամանակով 21:00-ին: