Բուլղարիայի մայրաքաղաք Սոֆիայում ընթացող միջազգային խոշոր մրցաշարում 28 երկրների 163 պատվիրակների թվում զգալի տոկոս են կազմում կաշվե ձեռնոցի անվանի վարպետները: Բացի Եվրոպական երկրներից ռինգում իրենց ունակություններն են դրսևորում նաև Կուբայի, Բրազիլիայի, Չինաստանի, Կորեայի, Ղազախստանի և Ուզբեկստանի ներկայացուցիչները:
ՀԱՕԿ լրատվության բաժինը տեղեկացնում է, որ Կարեն Աղամալյանի ղեկավարած մեր հավաքականի պատվիրակները վստահ ելույթներ են ունենում: Նախնական փուլի արգելքները հաղթահարել, կիսաեզրափակիչ են դուրս եկել և առնվազն երրորդ տեղն ապահովել Հովհաննես Դանիելյանը (49կգ), Արթուր Խաչատրյանը (81կգ) և գերծանր քաշային Սերգո Պողոսյանը:Նրանցից առաջինն այսօր կմրցի Բուլղարիայի, իսկ հաջորդ երկուսը` Կուբայի ներկայացուցիչների հետ:
Միավորների չնչին տարբերությամբ իրենց մրցակիցներին զիջեցին և պայքարից դուրս մնացին Վլադիմիր Սարուխանյանը (60կգ), Հովհաննես Բաչկովը (56կգ) և Բարեղամ Հարությունյանը (52 կգ):
Վաղը` փետրվարի 25-ին, տեղի կունենան եզրափակիչ հանդիպումները: