«Երևան Սիթի» սուպերմարկետը եթե Նոր տարվա շեմին աշխատողների խիստ կարիք էր զգում, այսօր արդեն նրանցից միմիայն ազատվել է ուզում: Արդեն 3 օր է, ինչ սուպերմարկետի մայրաքաղաքի բոլոր մասնաճյուղերում համատարած կրճատումներ են արվում` առանց որևէ լուրջ պատճառաբանության: Օրինակ` միայն սուպերմարկետի Ծերեթելիի մասնաճյուղի երշիկեղենի բաժնից վերջին 2 օրերի ընթացքում միանգամից հեռացվել է ավելի քան 20 հոգի: Կրճատումները վերաբերում են բոլոր բաժիններին, և խոսքը ոչ թե մեկ-երկու հոգու մասին է, այլ հարյուրավոր մարդկանց, որոնց սուպերմարկետն աշխատանքի է վերցնում առանց գրանցելու: «Երևան Սիթիի» արդեն նախկին աշխատողները զայրացած են հատկապես այն պատճառով, որ իրենց ընդունելիս ոչ ոք չի զգուշացրել, որ աշխատանքը ժամանակավոր է. «Հազար ու մի քննություն ենք հանձնել բաժնում մնալու համար, 15 օր էլ բոլորս անվճար ենք աշխատել, ամանորյա օրերին ուղղակի տքնել ենք, մի վայրկյան նստելու իրավունք չունեինք, իսկ հիմա, փաստորեն, ստացվում է, որ օգտագործում ու դեն են շպրտում»,- մեզ հետ զրույցում նշեց «Երևան Սիթիի» արդեն նախկին աշխատողներից մեկը: Ի դեպ, աշխատանքից ազատվածներից և ոչ մեկը չի փորձում բողոքարկել իրեն ազատելու որոշումը, քանի որ նման քայլին դիմողները ոչնչի չեն հասել: