«Շիրակ»-ի ավագ և փորձառու կիսապաշտպան Տիգրան Դավթյանը «ԲՄԱ-Էներգիա»-ի հետ հանդիպումից հետո ակումբի պաշտոնական կայքին տված հարցազրույցում նշեց, որ թիմի երիտասարդ ֆուտբոլիստները լավ տպավորություն թողեցին.
– Բավական լավ հանդիպում անցկացրինք: Առաջին թիմից ուժեղ թիմ էր «ԲՄԱ-Էներգիա»-ն: Դժվար հանդիպում էր, քանի որ հակառակորդը 90 րոպե պրեսինգով էր խաղում, մենք մտածելու ժամանակ չունեինք, պետք է արագ կողմնորոշվեինք դաշտում. դա էր մարզչի առաջադրանքը: Դաշտում բավական կոպիտ պայքար էր ընթանում: Պետք է ասեմ, որ մեր տղաները գեղեցիկ ֆուտբոլ ցուցադրեցին, պայքարից չխուսափեցին:
– Ի՞նչ կասես երիտասարդ ֆուտբոլիստների մասին:
– Նրանք շատ լավ տպավորություն թողեցին, հատկապես փոխարինման դուրս եկած Դավիթ Հակոբյանը, ով դարձավ գոլի հեղինակ: Արթուր Դավթյանը շատ լավ մտավ խաղի մեջ: Ինչ վերաբերում է ավելի փորձառու խաղացողներին, ապա կարող եմ ասել, որ Արա Մկրտչյանը, մտնելով դաշտ, արագացրեց մեր թիմի խաղը կիսապաշտպանության եզրում, իսկ Անդրանիկ Բարիկյանն առջևի գծում կարողանում էր գնդակ պահել, մինչև թիմը կդասավորվեր և կկարողանար կազմակերպել գրոհը:
– «Շիրակ»-ում այժմ երեք ֆուտբոլիստ փորձաշրջան է անցնում, ի՞նչ կասես նրանց մասին:
– Նորեկներից լավ տպավորություն է թողել կենտրոնական պաշտպան Դիդյե Բորիսը: Հարձակման գծում իրեն լավ է դրսևորում Ֆուֆանա Բեկոն, սակայն «ԲՄԱ-Էներգիա»-ի հետ հանդիպման ժամանակ նա թեթև վանսվածք ստացավ և չկարողացավ շարունակել հանդիպումը: Այժմ պետք է ձևավորել հարձակվողական եռյակ՝ Անդրանիկ Բարիկյան, Լի Լամին Յորո և պետք է ընտրել երրորդին: Այս հանդիպմանը ֆրանսիացի հարձակվողին ավելի քիչ ժամանակ տրամադրվեց, քանի որ նախորդ խաղին նա այդքան էլ լավ հանդես չեկավ:
– Ինչպե՞ս է անցում նախապատրաստական փուլը:
– Այս պահին ամեն ինչ ընթանում է այնպես, ինչպես նախատեսել էին մարզիչները: Ամեն ինչ նորմալ է: Կամաց-կամաց բարելավում ենք մեր խաղը: Դեռ շատ ժամանակ կա մինչև մրցաշրջանի մեկնարկը, և թիմը թե՛ ֆունկցիոնալ, թե՛ տակտիկական տեսանկյունից պատրաստ է 60-70 տոկոսով:
