Ծանրամարտիկ, աշխարհի չեմպիոն Նազիկ Ավդալյանը «Բարգավաճ Հայաստան» կուսակցությանն անդամագրվելու դիմում է ներկայացրել: Report.am-ի հետ զրույցում Ավդալյանը հաստատել է վերոգրյալը.
«Այո, ես ԲՀԿ-ին անդամագրվելու դիմում եմ ներկայացրել և սպասում եմ պատասխանի»:
Հարցին` ինչո՞ւ նա որոշեց դառնալ կուսակցական, վերջինս պատասխանել է. «Քանի որ ես այս շրջանում թողել եմ սպորտը, հետագայում էլ չեմ պատրաստվում միայն մարզչական գործունեությամբ զբաղվել, ընտրեցի քաղաքականությունը, որովհետև այդ ոլորտում ավելի շատ կկարողանամ օգտակար լինել իմ ժողովրդին: Սպորտը թողնելուց հետո պարտավորվածություն եմ զգում իմ ժողովրդի հանդեպ և այդ ձևով ինչ-որ չափով կկարողանամ նպաստել իմ ժողովրդին»,- ասել է ծանրամարտիկը:
Հարցին` քաղաքականության մեջ ինչպե՞ս և որտեղ է իրեն պատկերացնում Նազիկ Ավդալյանը, մարզուհին պատասխանել է, որ դա ցույց կտան հետագա գործողությունները:
Հիշեցնենք, որ Նազիկ Ավդալյանը երկու տարի առաջ ավտովթարի էր ենթարկվել և ստացել մարմնական վնասվածքներ:
«Բժիշկներն ասել են, որ 2 տարի դեռ չեմ կարող պարապել, եթե դրանից հետո թույլ տան, կարող է նաև զբաղվեմ սպորտով»,- նշել է մարզուհին: