Ինչպես հաղորդում է ղրղզական 24.kg լրատվական գործակալությունը, Ինտերպոլը հրաժարվել է աջակցել Ղրղզստանի իշխանություններին երկրի նախկին նախագահ Կուրմանբեկ Բակիևի, նրա հարազատների և մերձավորների հայտնաբերման գործում, որոնց դեմ ժամանակավոր կառավարության կողմից հայտարարվել էր հետախուզում: Այս մասին ասվում է Ինտերպոլի ղեկավարության կողմից Ղրղզստանի իշխանություններին ուղղված նամակում: Ինտերպոլի նամակում նշվում է, որ միջինասիական այդ պետությունից ստացված փաստաթղթերը թույլ չեն տալիս հայտարարել միջազգային հետախուզում: «Ինտերպոլին արգելվում է միջամտել քաղաքական, ռազմական, կրոնական կամ ռասայական բնույթի հարցերին»,- ասված է նամակում: Ինտերպոլից նաև կոչ են արել այդ կազմակերպությանը հղել այլ միջնորդություններ, քանի որ նշված անձանց դեմ կան հարուցված նաև այլ քրեական գործեր:
Հիշեցնենք, որ անցած տարի ապրիլին` Ղրղզստանում տեղի ունեցած հեղափոխությունից հետո, երկրի նախկին նախագահ Կուրմանբեկ Բակիևը լքեց երկիրը և բնակություն հաստատեց Բելառուսում: Մինչև այս պահը Բելառուսի իրավապահները հրաժարվում են Ղրղզստանին հանձնել Բակիևին, որի դեմ իր երկրում հարուցված են բազմաթիվ քրեական գործեր:
