e3e5.com կայքը տեղեկացնում է, որ ՖԻԴԵ-ի վարկանիշային աղյուսակով աշխարհի երկրորդ ուժեղագույն շախմատիստ Լևոն Արոնյանի և 3-րդ տեղը զբաղեցնող ռուս գրոսմայստեր Վլադիմիր Կրամնիկի միջև շախմատային մրցախաղը տեղի կունենա Շվեյցարիայի Ցյուրիխ քաղաքում` ս.թ. ապրիլի 21-28-ն ընկած ժամանակահատվածում:
Այս մրցախաղը կլինի առաջինը, որին կմասնակցեն 2800-ից բարձր վարկանիշային միավոր ունեցող շախմատիստներ: Արոնյանն ու Կրամնիկը միմյանց միջև կանցկացնեն 6 պարտիաներ, որոնք տեղի կունենան Ցյուրիխի Hotel Savoy Baur En Ville հյուրանոցային համալիրում:
Հիշեցնենք, որ Արոնյանն ու Կրամնիկը հանդիսանում են վերջին ամիսներին կայացած ամենապատվաբեր երկու մրցաշարերի հաղթողները. 36-ամյա Կրամնիկն առաջին տեղը զբաղեցրեց London chess classic մրցաշարում, իսկ 29-ամյա Արոնյանը դարձավ Հոլանդիայի Վայք ան Զեե քաղաքում կայացած Tata Steel շախմատային ամենամյա փառատոնի հաղթող: