2010 թ. ՀՀ մշակույթի նախարարությունն իրականացրել է մի շարք ծրագրեր, որոնք իրենց շարունակությունը կունենան նաև 2011 թ.:
2010 թ. նախարարության գերակա խնդիրը մշակութային ժառանգության պահպանության հիմքերի ապահովումն էր, որի լուծմանն ուղղված` իրականացվել են համալիր քայլեր:
Նախարարության համակարգի 24 թանգարաններում իրականացվել է շուրջ 900 հազար միավոր թանգարանային արժեքների վերահաշվառում, թանգարաններից 22-ն արդեն ունեն իրենց վեբ կայքերը: Կազմակերպվել է 7 նոր ցուցադրություն` Օրբելի եղբայրների և Խաչատուր Աբովյանի տուն-թանգարաններում, Հայաստանի պատմության թանգարանում` «Ուրարտու» հիմնական ցուցադրությունը, Երվանդ Քոչարին, Հարություն Կալենցին, Հովսեփ Կարալյանին, Վաղարշակ Էլիբեկյանին, Վարդգես Սիրունյանցին նվիրված հոբելյանական ցուցահանդեսներ:
2010 թ. ՅՈՒՆԵՍԿՕ-ի «Մարդկության ոչ նյութական մշակութային ժառանգության ներկայացուցչական ցանկում» ներառվել է Հայաստանի Հանրապետության ներկայացրած «Հայկական խաչքարի արվեստ. Խաչքարի խորհուրդն ու խաչքարագործությունը» ազգային արժեքը: ՅՈՒՆԵՍԿՕ-ի «Աշխարհի հիշողություն» անվանակարգում տարբեր երկրներից ներկայացված 11 հայտերի թվում, անցնելով անհրաժեշտ տեխնիկական փուլը, ընդգրկվել են Արամ Խաչատրյանի տուն-թանգարանում պահվող` կոմպոզիտորի 10 ստեղծագործությունների ձեռագիր նոտաները:
ՅՈՒՆԵՍԿՕ-ն հռչակել է «Երևանը` գրքի 2012 թ. համաշխարհային մայրաքաղաք»:
ՀՀ մշակույթի նախարարության պատվերով «Հայկական ճարտարապետությունն ուսումնասիրող» հկ-ն Արևմտյան Հայաստանում իրականացրել է 450 պատմամշակութային հուշարձանի վավերագրում: Նախարարության 2010 թ. մշակութային ծրագրերում գերակա ուղղություններից էր ժամանակակից արվեստի (երաժշտարվեստ, թատերարվեստ, կինոարվեստ, պարարվեստ, մշակութային կրթություն) ոլորտներում դեբյուտային, երիտասարդական և նորարարական ծրագրերի աջակցությունը, որոնք ուղղված են եղել հիմնականում երիտասարդների ստեղծագործական ներուժի խթանմանը, հայտնաբերմանը, խրախուսմանը, երիտասարդությանը մշակութային կյանք ներգրավմանը, ազգային մշակութային ժառանգության ուսուցմանը հաղորդակից դարձնելուն, ինչպես նաև սերնդափոխության շարունակության ապահովելու գործընթացին:
2010 թ. պետական պատվերով և պետական աջակցությամբ հրատարակվել է հոբելյանական, հանրագիտարանային, գիտական, գիտահանրամատչելի, գեղարվեստական, թարգմանական, երաժշտագիտական և նոտային, մանկական, սփյուռքահայ, ազգային փոքրամասնություննրեի լեզուներով ավելի քան 110 անուն գիրք:
Նախարարության միջոցառումների ծրագրերում նշվել են հաստատված 14 պետական և շուրջ 70 գերատեսչական հոբելյաններ: