ՀԱԿ առողջապահական հարցերի հանձնաժողովի նախագահ, առողջապահության նախկին նախարար Արարատ Մկրտչյանը անցնող 2010 թվականը գնահատելիս առաջնորդվեց ՀՀ Սահմանադրության 1-ին հոդվածով, որտեղ ամրագրված է, որ մեր երկիրը ինքնիշխան, իրավական և սոցիալական պետություն է. «Այդ ձևակերպումների տեսանկյունից եթե նայենք անցնող 2010-ին, ապա կտեսնենք, որ թե՛ սոցիալական, թե՛ իրավական, թե՛ ինքնիշխան լինելու առումով պետությունը ապրել է լրջագույն հետընթաց: Սոցիալական տեսանկյունից ակներև է, որ 2010 թ. ընթացքում ունեցանք շատ և շատ նոր շերտեր և զանգվածներ, որոնք ընկան աղքատության շեմից ներքև գտնվող սահմաններից անդին»:
Իրավական տեսանկյունից գնահատելով անցնող 2010-ը՝ Արարատ Մկրտչյանը նշեց, թե տեսնելով՝ ինչպիսի իրավիճակ է եղել մարդու իրավունքների ոտնահարման առումով, առաջընթացի մասին խոսելն ավելորդ է:
«Մի դրական բան նկատվեց 2010 թ.` մեր քաղբանտարկյալ ընկերների ազատ արձակման պրոցեսն է, որին նպաստեցին Հայ ազգային կոնգրեսի ջանքերը և ճնշումները, ինչը կարելի է համարել ընդդիմության նվաճումներից մեկը»,- կարծիք հայտնեց Արարատ Մկրտչյանը:
Իսկ թե ինչքանով էր 2010-ին Հայաստանը ինքնիշխան պետություն, Մկրտչյանն ասաց. «2010 թ. արտաքին մարտահրավերներին դիմանալու ունակություն չունեցավ այս իշխանությունը: Թե՛ հայ-թուրքական հարաբերությունների առումով և թե՛ ղարաբաղյան հարցի լուծման տեսանկյունից ապրեցինք հետընթաց, և ինձ թվում է՝ շարունակական կլինեն արտաքին ճնշումները միջազգային կազմակերպությունների և գերտերությունների կողմից»: