Խոսքի ազատության պաշտպանության կոմիտեի նախագահ Աշոտ Մելիքյանը 2010 թ. ընթացքում գրանցված կարևորագույն իրադարձություններից առանձնացրեց երկուսը:
«2010 թ. նշանակալի իրադարձություններից էր վիրավորանքի և զրպարտության մասին օրենքի ապաքրեականացումը, իր բոլոր բացասական կողմերով հանդերձ՝ այնուամենայնիվ, դա կարևոր քայլ էր: Պետք է նաև առանձնացնեմ թվայնացման գործընթացը, սակայն այստեղ դժվար է որևէ դրական բան ասել, քանի որ և՛ «Հեռուստատեսության և ռադիոյի մասին» նորացված օրենքը, և՛ թվայնացման հայեցակարգը չեն լուծում այն կարևոր խնդիրները, որոնք կան այդ ոլորոտում, և ավելին՝ նոր մարտահրավերներ առաջացրին: Կարծում եմ, որ թվայնացման պրոցեսը լուրջ խնդիրների է հանգեցնելու մեզ, եթե թե՛ օրենքը և թե՛ թվայնացման գործընթացը չհամապատասխանեցվեն միջազգային ստանդարտներին»:
Խոսքի ազատության առումով, Աշոտ Մելիքյանի գնահատմամբ, 2010 թվականը շատ ավելի հանգիստ էր, քան նախորդ տարիները. «Սակայն նույնիսկ այդ հանգիստ տարվա ընթացքում ևս գրանցվել են լրագրողների մասնագիտական գործունեությանը խոչընդոտման փաստեր, ունենք նաև բռնություններ: Մի բան է հետաքրքիր, որ այս տարվա երրորդ եռամսյակում լրագրողների հանդեպ ոչ մի ֆիզիկական բռնություն տեղի չունեցավ, և եթե համեմատենք նախորդ տարիների հետ, ապա դա աննախադեպ երևույթ էր` սենսացիա, քանզի վերջին տարիներին այդպիսի եռամսյակ առհասարակ չի եղել: Սակայն չորրորդ եռամսյակում բռնության փաստեր արձանագրվել են»: