«Մեզ շատ հաճախ փորձում են մեղադրել, որ մենք պասիվ ենք, սառեցրել ենք իրավիճակը և այլն, բայց ես կուզեի մի քանի փաստերով ներկայացնել ՀԱԿ-ի գործունեությունը այս ընթացքում, որը, իմ կարծիքով, լրիվ ջարդում է այդ տեսակետները»,- այսօր կայացած Հայ ազգային կոնգրեսի քաղխորհրդի այս տարվա վերջին նիստին հայտարարել է Կոնգրեսի համակարգող Լևոն Զուրաբյանը: Նիստին մասնակցել են նաև ՀՀ առաջին նախագահ Լևոն Տեր-Պետրոսյանը, Կոնգրեսի անդամ կուսակցությունների առաջնորդները: Ամփոփիչ ելույթում Զուրաբյանը ներկայացրել է այս տարվա ընթացքում Կոնգրեսի կողմից կատարած միջոցառումները. երթեր, բազմահազարանոց հանրահավաքներ` 15000- 40 000 մարդու մասնակցությամբ: «Բացի դրանից մենք նաև անցկացրել ենք 7 հանրահավաք Հայաստանի տարբեր քաղաքներում: Ես չգիտեմ՝ ուրիշ ակտիվ քաղաքական ուժ Հայաստանում գործել է, թե չէ այս տարվա ընթացքում, որը այսքան ակտիվ գործունեությամբ է զբաղվել և այսքան մարդ է մոբլիզացրել»,- նշեց Լ.Զուրաբյանը: Նա որպես կարևոր նվաճում համարեց այն, որ, ի վերջո, այն բոլոր խոսակցությունները, որոնք Կոնգրեսը դեռ 2008թվականից վարում էր ստվերային կառավարության ստեղծման մասին, կարելի է համարել այլևս իրականություն: «Եթե դուք հիշում եք, մենք այս տարվա փետրվարին առաջին անգամ հասարակության դատին ներկայացրեցինք համատեղ 100 քայլ սոցիալ-տնտեսական վերափոխման ծրագիրը, ինչը նշանավորեց մի շատ կարևոր անցում Շարժման մեջ։ Եթե 2008 թվականի օգոստոսի 1-ի Հռչակագրի համաձայն մենք միավորվել էինք հանուն Սահմանադրական կարգի վերականգնման, ազատությունների վերահաստատման, քաղբանտարկայլների ազատման, ազատ մամուլի և այլն, այս հարցերի շուրջը մենք փաստորեն այս պահին կատարեցինք մեկ քայլ առաջ և այսօր մենք միավորված ենք նաև սոցիալ-տնտեսական համատեղ մշակված ծրագրերի շուրջը, կառավարման այլ բնագավառներում մշակված համատեղ ծրագրերի շուրջը, որը վերաբերում է և՛ առողջապահությանը, և՛ կենսաթոշակային ռեֆորմներին: Հիմա արդեն ավարտում ենք աշխատանքը գիտության, կրթության և մշակույթի ծրագրերի վրա: Այսինքն` նշանակում է , որ 2010 թիվը մենք կարող ենք համարել ՀԱԿ-ի կայացման, հզորացման, Հայաստանում ընդհանրապես քաղաքացիական հասարակության կայացման և հզորացման տարի»,- նշեց Լ.Զուրաբյանը: Վերջինս բոլորին նաև շնորհակալություն հայտնեց ակտիվ աշխատանքի, բարձր ոգու համար, այն բանի համար, որ ոչ ոք չհանձնվեց, ոչ ոք չլքեց պայքարը: «Բոլորի մեջ տեսանելի է և՛ պատրաստակամություն պայքարի լծվելու, և՛ նպատակներին հասնելու: Ես կարծում եմ, որ մենք ճիշտ ուղու վրա ենք»,- հավելեց Լևոն Զուրաբյանը։
