«Լեռնային Ղարաբաղ. կարգավիճակ առանց կարգավիճակի»

Ադրբեջանցի վերլուծաբանները քննարկում են կազմակերպել` ամփոփելով Ղարաբաղյան բանակցությունների 2010-ի իրադարձությունները։
Բաքվում հանդիպումն անցկացվել է Մամուլի կենտրոնում։ Մասնակիցները քննարկել են Ղարաբաղյան հակամարտության կարգավորման հնարավորություններն ու հնարավոր կարգավիճակը` հաշվի առնելով հակամարտությունները լուծելու միջազգային փորձը։
Ըստ «Ազատություն» ռ/կ-ի`ներկայացվել է «Ատլաս» հետազոտությունների կենտրոնի ղեկավար Էլհան Շահինօղլուի «Լեռնային Ղարաբաղ. կարգավիճակ առանց կարգավիճակի» գիրքը, որտեղ նա հակամարտությունների լուծման ու ինքնավարություն տրամադրելու 10 մոդել է ներկայացնում։
Նա նշել է, որ անցնող տարում` 2010-ին, Ռուսաստանի միջնորդությունից իրական արդյունքներ չկան Ղարաբաղի հարցում։ Բացի այդ, օգոստոսին Ռուսաստանը ռազմական նոր համաձայնագիր ստորագրեց Հայաստանի հետ Գյումրիում ռուսական ռազմակայանի տեղակայման ժամկետը երկարաձգելու վերաբերյալ։ Միաժամանակ, պաշտոնական Մոսկվան հանձն առավ Հայաստանի անվտանգության ապահովումը։ Ռուսաստանը հստակ ցույց է տալիս, որ ճնշում չի գործադրի Հայաստանի վրա, իսկ պատերազմի դեպքում էլ կօգնի Երևանին։
Ինչ վերաբերում է 2011-ի կանխատեսումներին` Շահինօղլուն նշել է, որ հնարավոր է՝ շարունակվեն «անպտուղ բանակցությունները», չբացառելով, որ շփման գծում կարող են լինել տեղական բախումներ։ Նա չի բացառել նաև լայնամասշտաբ պատերազմը` չնայած միջազգային հանրության ակտիվ մոնիթորինգին։ Մադրիդյան սկզբունքների մասին ադրբեջանցի փորձագետն ասել է, թե Հայաստանի պահանջը` նշանակել հանրաքվեի օրը, որով պետք է որոշվի Ղարաբաղի կարգավիճակը, արգելափակում է բանակցությունները։ Միաժամանակ նա նշել է, որ այդպիսի հանրաքվեն, որը, անկասկած, շրջանը կանջատի Ադրբեջանից, անընդունելի է Բաքվի համար։
Միջազգային ճգնաժամային խմբի փորձագետ Թաբիբ Հուսեյնովը ասել է, թե այս պահին ռեալ չէ քննարկել Ղարաբաղի վերջնական կարգավիճակի հարցը։ «Կողմերի նույնիսկ ամենաազատական ու կառուցողական ներկայացուցիչները չեն կարող համաձայնության հասնել Ղարաբաղի վերջնական կարգավիճակի հարցում դիրքորոշումների անընդունելիության պատճառով», – ընդգծել է նա:
Հուսեյնովի կարծիքով` Մադրիդյան սկզբունքների արժեքն այն է, որ հետաձգվում է Ղարաբաղի վերջնական կարգավիճակի հարցը` պայմաններ ստեղծելով մյուս խնդիրները լուծելու համար։