«Լեզվի մասին» ՀՀ օրենքում իշխանությունները, այնուամենայնիվ, որոշեցին փոփոխություններ անել` հաշվի չառնելով Հանրային խորհրդի կարծիքը: Հիշեցնենք, որ Հանրային խորհրդի կարծիքով` «Լեզվի մասին» օրենքը ենթակա չէ փոփոխության: Հանրային խորհրդի անդամ Արշակ Սադոյանը,սակայն, այսօր դեռ տեղյակ չէր փոփոխություններից: « Ճիշտն ասած` ես ծանոթ չեմ այդ փոփոխություններին, քանի որ որեւէ տեղ զետեղված չեն: Ամեն դեպքում, «Լեզվի մասին» օրենքի հետ կապված` պետք է բավական խիստ լինել եւ թույլ չտալ, որ այնպիսի փոփոխություններ լինեն, որոնք ինչ-որ ձեւով կնսեմացնեն մեր լեզվի կիրառությունը»: Իսկ օտարալեզու դպրոցների վերաբերյալ Հանրային խորհրդի որոշումը, Արշակ Սադոյանի խոսքերով, միարժեք է: «Օտարալեզու հանրակրթական դպրոցներ չի կարելի այսպես բացել, որովհետեւ դա հայ ժողովրդի մշակութային արժեքների, լեզվի պահպանման տեսակետից վտանգավոր ե՛ւ սխալ է, ե՛ւ այդ առումով Հանրային խորհուրդն իր տեսակետը հայտնել է: Կարծում ենք, որ վաղը-մյուս օրը այդ կարծիքը լուրջ հաշվի կառնվի, եւ հանրակրթական ոչ հայերենով օտարալեզու դպրոցներ բացելուց հետո կզգացվի, որ դա իմաստ չուներ»,- հույս հայտնեց Արշակ Սադոյանը: