S&P միջազգային վարկանիշային գործակալությունն իջեցրել է մի շարք միջազգային ֆինանսական ինստիտուտների, ներառյալ ԱՄՆ խոշորագույն՝ Bank of America, Goldman Sachs և Morgan Stanley բանկերի վարկային վարկանիշը: Ինչպես հաղորդում է Associated Press-ը՝ վկայակոչելով S&P-ի ներկայացուցիչներին, վարկանիշների իջեցումը կապված է բանկերի գնահատականների չափանիշների նոր համակարգի ներմուծմամբ, որը հաշվի է առնում մակրոտնտեսական ցուցիչները, այդ թվում՝ կառավարության և կենտրոնական բանկերի ազդեցությունը:
Bank of America, JPMorgan Chase բանկերի վարկանիշն իջեցվել է «A+»-ից «A»-ի, իսկ Merrill Lynch & Co. Inc., Citigroup Inc., Goldman Sachs, Morgan Stanley ֆինանսական ինստիտուտներինը՝ «A-»-ից «A»-ի: Իջեցվել են նաև Մեծ Բրիտանիայի մի շարք առաջատար բանկերի վարկանիշները (Barclays PLC, HSBC Holdings PLC, Lloyds Banking Group PLC և Royal Bank of Scotland):
Ընդհանուր առմամբ, գործակալությունը վերանայել է 37 առաջատար ֆինանսական ինստիտուտների վարկանիշը:
Ավելի վաղ հաղորդվում էր, որ մեկ այլ խոշոր վարկանիշային գործակալություն՝ Moody’s-ը, ուսումնասիրում է 15 երկրներում (Իսպանիա, Իտալիա, Ֆրանսիա, Ավստրիա) 87 եվրոպական բանկերի վարկանիշներն իջեցնելու հնարավորությունը:
